ScapeGoatz an Oh4

Kum hmasa lamah Pasalṭha video kha ZONET channel ah leh Youtube lamah an lo dah chhuak tawh a. Tunhnaiah pawh play a la hlawh hle mai.

Inrinni kal ta khan an hla thar, 'Oh4' music video chu an siam zo a, a video hi sum senna tam lo thei ang bera an tih a ni a, Studio leh Jam room vela mahni sum inthawhkhawma ṭhianhoa an shoot a ni. Video editing lamah ROAR Media Productions kutchhuak a ni thung a, Youtube-a ROARTV channel-ah an dah a, en a hlawh nghal leh hle. Local Channel lamah erawh zaninah en theih tura beisei a ni.

An hla hmasa Pasalṭha kha lo ngaithla tawhtu tan chuan Oh4 hi beisei loh lam daih a ni dawn a, a music kalhmang hi mipui chawk hlim thei tur leh, tiphur thei tur zawngin a kal ber. A hla hi a ṭang ṭha a, mahse a heavy tawh lo thung. Mizo mipui tam zawkin ngaihthlak nuam an tih theih tura an siam an ni nghe nghe.

"Lenglawng lam hla a ni a, Oh4 ngaithlatu hnena khawvel nun an hman zel tura duhsakna hlanna a ni. Nula tlangval tia mipuiin an ngaih rual kan nih tawh chuan kan nun dan turah zalenna kan nei a, kan duhzawng leh ṭha nia kan hriat chu kan tih a thiang. Kan vanglai hun erawh a la tawp dawn a, a lo tawp a nih pawha rilru hahna leh hrehawmna min thlen tura khawvel chen lo turin vawiin ni hmang ṭha tura fuihna hla a ni," tiin Puia (guitarist) chuan Oh4 hla awmzia a sawi.

He hla an record na hmun hi Kings and Prophets Recording Studio, Ramhlun North ah a ni a, "An fel a, min kawm tlangnel peih a, kan record lai leh mixing an tih lai pawhin kan duh loh leh duhzawng eng pawh inthlahrung loin kan sawi ngam a, kan duhthusama ṭhain min chhuahsak a ni," tiin Dika (drummer) chuan Kings and Prophets te chungah lawmthu a sawi bawk.