Best Actors of 21st Century List No 2 Emma Stone an sawisel

Kum zabi 21-naah cinema khawvelah lemchan thiam ṭha tak tak an chhuak a, hetih lai hian The Independent-in "60 Best Actors of 21-Century Cinema"list a tih chhuah chu sawizui leh sawisel a hlawh hle. A chhan ber chu No 2-a Emma Stone an dah vang a ni.

"60 Best Actors of 21-Century Cinema" list-ah hian No 1-ah 'Capote' leh 'The Master' changtu, fam ta Philip Seymour Hoffman a awm a, No 2-ah Emma Stone hi a awm a ni. No 1 hauhtu hi an sawisel lo a, a phu pawh an ti tlangpui. Hetih lai hian 'La La Land' star Emma Stone erawh eng tehna hmang mahin kum zabi khat chhung lemchan thiam ber dawttu dinhmun hauh thei a ni lo tiin, social media lamah an sawizui nasa. List siamtu, The Independent lam pawh an chhal zui nasa hlawm hle. Christian Bale chu No 14-ah langin, Viola Davis chu No 39 leh Denzel Washington No 4-ah an lang bawk. No 26-a Joaquin Phoenix leh No 32-a Frances McDormand an dahte chuan dah hniam lutuk tiin an sel bawk. The Independent culture team pawhin actor-te ranking siam chu thil harsa tak a nih thu an sawi ve bawk a, an thlan dan criteria pawh an sawilang a, heng zingah hian range, consistency leh choice of role te pawh a tel.