Ṭhazual chart C. Sanga a la mawi ber zel

'Chhingkhual Lenmawi' a phuahtute duh dan ang chiahin

Hapta hnih hnuah pawh C. Sanga 'Chhingkhual Lenmawi' chu Rainbow Ṭhazual Lengzemah a la mawi ber zel a, pakhatna a luah leh. Tun hi he hla hmanga C. Sanga'n Ṭhazuala pakhatna ṭum hnihna a luahna a ni.

He hla, Chhingkhual Lenmawi tih hi C. Sanga hian ama duh ang taka sa loin, a phuahtu, PS Chawngthu-in a phuah ang tak, PS Chawngthu chhungtena an duh ang takin a sa. Sak dan tam ber leh a lar dan berah chuan 'Chhingkhual Lenmawii' tih a ni ṭhin a, mahse a phuahtu phuah ang tak chuan 'Chhingkhual Lenmawi' tih ringawt a ni. C. Sanga chuan, "Pu PS Chawngthu chhungte hian a phuah dan ang loa sak lar a ni leh, mitena kan hriat dan ber a ni ta chu ṭha lo an ti a, he hla ka sak dawn pawh hian an duh ang, a phuahtu phuah dan ang taka ka sa dawn lo a nih chuan sak an phal loh thu min hrilh a ni," a ti.

"Ka siam uluk a, mitena an duh tur ang kan ngaihtuah nasa hle. Miin mawi an tih theih tur, a video pawh mawlmang ang reng tak, hmuh nuam leh hmuhnawm si kan duh a, chutiang chuan kan siam a, a chei pawh kan chei nasa lo hle a ni," a ti.

C. Sanga hian tunah hian music video a buatsaih mek bawk a, engtikah nge a chhuah ang tih erawh a sawi thei lo. "Kum thum vel kan buaipui tawh a, kan la peih hlei thei lo, amaherawhchu tihchhuah thuai erawh kan tum ve a, hma kan la mek," tiin a sawi. 'Thlêmna duhawm' hla chungchang sawi chhuak lehin, "Ṭhazual Awards sem zan khan kha hla phuahtu, VL Awia pawh a rawn kal ve a, ka lo hmu miah lo," a ti. A rhyme a dik a, a lam pawh a nuam a, a sak pawh a nuam tih a sawi a, "Anniho hi hla phuah an thiam a, an hla phuah kalhmang pawh a danglam. Eng bawihah emaw chuan a tang a, chu chu eng nge a ni tih a sawi duh lo a ni," a ti.

Famkimi Kawlni chu pahnihnaah a rawn chuang kai a, pathumna aṭangin a hla 'Ka ngai em che' hmangin a rawn kang chho zel. Feli Fanai a rawn invawrh chak hle a, pasarihna aṭangin pathumnaah a rawn kai chho. Pahnihna aṭangin Christy chu palinaah a chhuk a, Thiamchantira chu a ngai, panganaah a la awm.