N. America-ah Jurassic World a bon
Kumina movie hlawhtling ber a ni mai lo, movie chhuak tawh zawng zawng zinga opening week-a sum lalut hnem ber dawttu a ni. Jurassic World film hi a siamtute beisei aia nasain a che bon.
Jurassic World hian kar tawp chhung khan North America-ah dollar mtd 204.6 zet a lalut hem mai a, a siamtute chuan dollar mtd 155 a hmuh an beisei a, an beisei zat an khum chiang hle a ni. Movie tihchhuah tawh zinga opening week-a sum lalut hnem ber dawttu a ni a, lalut hnem ber chu Avengers kha a ni a, opening week-ah dollar mtd 207.4 zet a lalut.
Jurassic World hi North America-ah mai ni loin ram dangah pawh a hlawhtling hle. Ram 66-ah tihchhuah a ni a, heng aṭangte hian dollar mtd 307.2 zet a lalut a, hengte nena a sum hmuh tawh zawng zawng hi dollar mtd 511.8 zet a tling tawh. Khawvel puma a sum hmuh tawh zawng zawng hi a tam hle a, movie tihchhuah tawh zinga kar khat chhunga khawvel puma sum hailut hnem ber a ni a, "Harry Potter and the Deathly Hallows: Part II" a rawn khum ta.
"Harry Potter and the Deathly Hallows: Part II" hian kar khat chhungin, khawvel pumah sollar mtd 483.2 lai a lalut thei a, Jurassic World hi kar khat chhung dollar mtd 500 hmu tling hmasa ber a ni. He film hi dinosaur film a ni a, Chris Pratt chu a changtu ber a ni.
Box office movies:
"Jurassic World" - $mtd204.6
"Spy" - $mtd16
"San Andreas" - $mtd11
"Insidious Chapter 3" - $mtd7.3
"Pitch Perfect 2" - $mtd6
"Entourage" - $mtd4.3
"Mad Max: Fury Road" - $mtd4.1
"Avengers: Age of Ultron" - $mtd3.6
"Tomorrowland" - $mtd3.4
"Love & Mercy" - $mtd1.8