Diddy documentary ti chhuak dawn

Music industry-a hming langsar leh hlawhtling tak, mahse thubuai tam tak nei mek, Sean P.Diddy documentary, 'Diddy : The Making of a Bad Boy' chu January 14 hian Peacock-ah tih chhuah a ni dawn. Documentary trailer hi tih chhuah ni tawhin, Diddy hi 'monster' tiin an sawi hial a, he documentary-ah hian a rawn lar chhuah aṭanga a tluk chhiat dan, a hmaa la hmuh ngai loh a party neih dan footage te pawh tih lan a ni ang.

Ample Entertainment, Blink Films leh FGW Productions siam, documentary-ah hian Diddy nuna mi pawimawh tak takte interview-na pawh a tel a, a naupan lai ṭhian, a bodyguard hlui leh a talent show buatsaih, 'Making the Band' winner an kawmna pawh a lang. Puffy aṭanga Diddy a nih chhoh dan te, hlawhtlinna nasa tak a chan chhoh dante tarlan a nih rualin, a hlawhtlinna phena thil mawihnai lo tak tak awm nia an puhna hrang hrangte pawh a lang bawk ang. Diddy hi September 2024 khan New York City-ah man niin, Brooklyn-a Metropolitan Detention Centre-ah hren mek a ni. A legal team lamin vawi tam tak bail tumin hma la mah se, an la hlawhtling lo. Kumin May thlaah a thubuai hi ngaihtuah ṭan a ni dawn a, thiam loh chantir a nih chuan dam chhung tang tura hrem theih a ni dawn a ni.