Coldplay-in Ahmedabad concert neih turah hriattirna dawng

Coldplay chuan January 25 leh 26-a Ahmedabad-a Narendra Modi Stadium-a concert an neih tur atan District Child Protection Unit,Ahmedabad aṭangin hriattirna an dawng. Concert neihnaah hian stage-ah naupang, kum tling lo chu eng thilah mah hmang lo turin an ti. He hriattirna hi concert organiser-te pawh pek an ni bawk.

Unit chuan concert-naah an naupang chu earplug tel loa luh tir lo turin a ti bawk a, sound level 120 decibel aia sang chuan naupang hriselna lamah nghawng a neih theih thu an sawi. Heng hriattirna an pekte hi an zawm lo a nih chuan khauh taka action lak a nih tur thu District Child Protection Unit chuan a sawi. He hriattirna hi Chandigarh-a assistant professor, Pandit Rao Dharnevar-a'n complaint thehluh aṭanga siam niin, Dharnvar chuan concert-na hmuna sound ring lutuk leh light eng tak takte chuan naupangte taksa lam leh rilru lamah nghawng ṭha lo a siam thei tih a sawi a, hmundangah pawh naupangte dikna chanvo humhalhsak turin hma a la zel dawn tih a sawi. A hma pawhin Punjabi singer, Diljit Dosanjh-a'n December 31, 2024-a Ludhiana-a concert a neih dawn khan complaint hi a lo theh lut tawh bawk a, hei vang hian hemi ṭuma a concert-ah hian a hla ṭhenkhat, zu fakmawina lam 'Patiala Pegg,' '5 Tara Theke,' leh 'Case (Jeeb Vicho Feem Labbiya),' chu a sak khapsak a lo ni tawh a ni.