Zualbawihi A album thar a hnai

Nipui laiin Krismas hla min ngaihthlaktir a tum!

Mizo Idol aṭanga Zoram khawvelin ka hriat, R. Lalhmangaihzuali, Zualbawihi chu music video album tichhuak turin a inpeih thawkhat ta a, July thla tir hian a tichhuak ang. He album-ah hian i beisei loh deuh tur a awm a, chu chu Krismas hla a ni; nipui laiin thlasik boruak kan tem ṭan dawn a nih hmel!
Zualbawihi album thar tur hi 'Vul reng rawh' tih a ni dawn a, tunah hian a album cover tur a rawn thleng tawh a, tihchhuah hun a hnai tawh khawp mai. "A album cover tur a rawn thleng fel tawh a, tih tur tam tak chu la awm tho mah se, tihchhuah hun erawh a hla tawh lo ang. July thla tira tihchhuah kan tum a, a ni tak erawh chu kan la tichiang thei rih lo. Keimahni mai bakah min pui a, min ṭawiawma min phurpuitute hman remchan hun kan thlir tel mek a ni," a ti.
Kum 2012 khan 'A na asin' tih album a lo tichhuak tawh a, tun hi a album pahnihna tur a ni. Tunlaiah zaithiam tam takin album an tichhuak ngam tawh lo a, piracy avangin hlawkna a awm tawh meuh lo a, chutihlaia album a siam ngam bikna chhan zawhna chu, "Hlawkna lam ai mah chuan record ṭha, dah ṭhat tur leh ka kutchhuak awm reng tur kha ka duh a ni. Ka zai theih lai, thil tih a awlsam lai hian a theih anga tam hnuhma hnutchhiah ka duh a ni," a ti.
'Vul reng rawh' album-ah hian hla 20 a awm dawn a, heng zinga 17 chu music video a ni ang. Hla zingah hian Krismas hla a dah tel dawn a, heng a hlate hi music video-in, a malin TV lamah dah chhuah zel a tum a, kumin Krismas dawn hnaihah a album-a Krismas hla pawh hi kan hmuh ngei a beiseiawm viau.
Zualbawihi album-a hla eng emaw zat hi chu TV lamah single-in kan hmu tawh hlawm a, hla thar hlak, kan la hmuh ngai loh chu paruk a awm dawn. A album-a hla hi a variety a ṭha hle dawn a, lengzêm bakah, nungcha, ramngaw humhalhna lam te pawh a dah tel dawn a ni. A album hming put chhan, 'Vul Reng Rawh' tih hla hi Venpuia Khawlhring phuah a ni a, a hla dang pahnih a awm bawk ang.
Lungmuana nena an duet-na 'Ka thlang ber che' tih hla tun hnai lawka Zonet-a dah thar, Zualbawihi chuan, "Tun maiah hian duh tawk ka la tum lo a, album dang pawh buatsaih leh ka rilruk. Album dang ka buatsaih leh tur hi chu hnam hla, chheih zai lam deuh, Mizo zai ang type deuh kha a ni ang," a ti.