Mt. Everest awmna a insawn hret

Nepal lirnghing kha a na hle a, kha lirnghing vang khan khawvela tlang chhip sang ber, Mt. Everest chu a awmna hmun a insawn. Hei bakah hian Kathmandu khawpui pawh a awmna a insawn hret.

Chinese chanchinbuten an tarlan dan chuan Mt. Everest hi April thlaa lirnghing vang khan chhim thlang lamah, a awmna ṭhin pangngai aia inchi 1.2 velin a insawn. Nepal leh Himalaya tlang dung hi India khawmual leh Asia khawmual innawrin a siam a ni a, kum 10 vel kalta chhung khan Mt. Everest hi, khawmual pahnih innawr tawm zel avangin centimetre 3-in a san belh niin, China chanchinbut hian an tarlang a, hemi chhung tho hian hmar chhak lam hawiin centimetre 40 zetin a tawlh chho niin an sawi bawk. Tun lirnghing khan Everest tlang chhip hi a tawlh lohna lam aṭangin nghawr tawlh a ni an ti.

Lirnghing avang vek hian Kath­mandu khawpui pawh a awmna ṭhin hmun pangngai aia feet 10 zetin khaw­thlang lamah a tawlh thlak phah.

Lirnghing hi khawmual pahnih innawrna laiah a awm thleng duh hle a, a thlen duhna hmunah pawh Ring of Fire an tih, Pacific hmuna mi hi a nasa zual hle. Khawvela lirnghing zawng zawng zaa 80 zet chu Ring of Fire-ah an tih huam chhunga thleng a ni a, helai hmunah hian tlangkang pawh 452 zet a awm.

Khawvela lirnghing thleng tawh, chhinchhiah china nasa ber mai chu kum 1960-a Chile-a thleng kha a ni a, magnitude 9.5 zeta na a ni. Hemi ṭuma lirnghingah hian khawvel pumah seismic wave a kal chhuak vek a, ni eng emaw zat chhung chu he wave hian khawvel a sawi a, chu chu mihring pangngai tan erawh hriat tham loh a ni thung.

Tuihnuaia lirnghingah chuan kum 2004-a mi khan chhiatna a la thlen nasa ber. Kha tuihnuai lirnghingin a siam tuifawn, tusnami khan ram 11 zet a nuai a, mi 225,000 zetin an thih phah a ni.