Gigi Hadid Supermodel a ni nge ni lo?

Tunlai khawvela social media lam inhnialna pakhat chu model chhe lo Gigi Hadid hi supermodel a ni nge ni lo tih hi a ni. Amah tak hi chuan supermodel a inti a, mahse mi tam takin an pawmpui lo.

Gigi hian supermodel ropuite a intehkhin a, Cindy Crawford, Claudia Schiffer leh Naomi Campbell te chu an hunlaia tuma tluk loh an ni angin, amah Gigi bakah Cara Delevinge leh Karlie Kloss chu anmahni ang niin a sawi. Hetiang thil vel avang hian amah hawtute chuan an ko na sak sak hle a, 'thau' tia an koh ṭhin mai bakah, tuna a pian ang hi 'anorexic' an tihsak. Pian nalh loh hlau lutuk vanga ei tur lama inhrek a, a hnu zela ei châk lohna nei zui a, chêr tial tial angin an sawi a ni. Mahse amah ber chuan hetianga an sawi hian engtin mah a khawih danglam lo a ni a ti.

Instagram ṭhatzia a sawi nual a, modelling khawvelah chuan instagram hi thil ṭha, mite tiṭangtu a ni a ti a, chutihlai chuan amah dotute chuan insta hian modelling industry a tichhia a, talent nei ṭha aiin miin an like nasat zawkte an dinchan phah a ni an ti. Supermodel ropui ṭhinte khan an danglamna, an ṭhat bikna te an sawi chhuak duh mai mai lo a, Gigi erawh chuan sawi nuam a ti hle bawk an ti.