Fashion Fiesta Mizo Designer

Khawthlang ramte tih dan kan sawi ngun ta malh malh bawk a, tun tum chu ram chhung a designer lar leh mite entawn berte hnen
aṭangin Trend report thailan kan tum dawn a ni. Puanṭhui thiam veng tinin kan kawl fur awm e. Thiam deuhte leh thiam sawih sawih thlengin a zawng a za rawn thai lang thei dawn lo mah ila, Zoram mipuite leh zo hnahthlak hmun danga awmtena kan belh rawn ber designer-te hnen aṭangin Zoram mipui tena kan uar leh ngainat deuhte han tarlang dawn ila.

Khatla kawn lama kan designer lar Muanpuii Chinzah chuan a tlangpuiin nu valai kum 20 aṭanga 40 inkarin an dawr nasat thu min hrilh a, a par lampang an ṭhui vak loh thu min hrilhin China lam aṭanga Gorgette puan ṭha chu a customer tam zawkin an ngainat thu leh casual leh formal an ṭhui nasat thu min hrilh. Hei bakah hian designer dang ang lo takin kum tluanin leather Jacket, Coat, Trench leh Summer Jacket te an
ṭhui nasat thu leh mo kawr chenin an ṭhui ṭhin tih min hrilh a, hmun dang ang lo bawkin mo kawr lamah pawh Mermaid Cut lam an ṭhui nasat thu min hrilh bawk. Mizoram pawn lam aṭanga regular taka dawr ṭhintute zingah Australia leh US lama kan unau te chawlhni kawr a tam thu min sawiin, Goa lam aṭangin nu upa lam deuh hlek pawn kawrfual, dress puipun nia hak chi an ṭhuisak nasa tih min hrilh bawk. A puanthan kawl zinga nalh dangdai em em mai Paris lam aṭanga lakluh lace man tam, India designer lar Sabya Sachi-ina a collection-a alo hman ang chi lace te an la uarin lace chhuak hmasa erawh chu a out ṭan tawh tih min hrilh a ni.

Muanpuii aṭanga hla vak lovah hian Vakiria chhul chhuak Haus of Angu Vhl awmin, a neitu Angu hi designer lar chho mek a ni a, thla rei lote aṭang khan design studio a hawng ve
ṭan a, atir aṭangin duhtu leh ngaisangtu a nei ṭha hle a, mipa leh hmeichhiain an dawr kawp avang leh, ṭhalai deuh ala nih vangte pawh ania nge, customer bik deuh ala nei lo. Lace lam a khawih lo deuh tawp a, cut sawm leh puanthan mixed kual vel a uarin puanthan plain a hmang nasa. Casual, abikin mipa T-Shirt a ṭhui nasain hmeichhe kawrfual an ṭhui deuh reng bawk a, order aiin readymade a hralh ṭhat zawk thu min hrilh. A collection-hi mixed match lam deuh ala ni a, a duh smart lutuk lo a, a customer te pawh chutiang lam hawi vek chu an la ni hrih.

Diva fashion and Bridal, Lalbuaia Shopping Complex-a hmun nei chuan casual ṭhui tam lovin formal an ṭhui tam thu min hrilh a, a sawi dan takin casual hi chu man tlawm zawkin veng chhung puanṭhui thiam ten an ṭhui theih ṭhin avangin designer tan ṭhui tam a harsat bakah, mi nawlpuiin casual atana insen vak kan ui ṭhin vang te pawh a ni ang e. Lace lam an la ṭhui nasa a, an customer tam zawkin kawr nghawng chip an duh thu leh chei vak loha in-cut nasa an uar. Mo kawr lamah A cut mipui lamah ala tla na reng a, mo ṭhian erawh simple deuh, nu deuh hnap lam te a kal thung tih min hrilh.

A hnuai chiah Vakiriaah thung chuan mi nawlpuiin a par an hne a, puan plain dak ṭha lam uarin, a ban design dangdai tak tak an uar hle tih min hrilh a, an hming pakhat, Computerised Embroidery khawl hmanga kawr chei par an uar chho leh a, nuho lamah erawh lace ala ṭhing thei lo. Rawng lamah erawh maroon ala kal zel a, hei bakah beige nude colour kan tih mai taksa rawng ang customer ten an la ngainat ber thu min hrilh bawk. Tunhnaia sports wear an tihah ve thung chuan infiam mi ni kher lo, ṭhian ho leh department ang zawng pawhin customer an ngah hle a, a tlangpuiin grey leh navy blue an ngaina fal. Casual an ṭhui tam lo hle a, 80 % vel formal an ṭhui thu min hrilh bawk. Online site-ah ve thung chuan Delhi, Shillong leh Guwahati lam
aṭangin customer an tamin heng ho pawh hian formal an lei tlangpui.

Chanmari kawn lama ka design studio-ah ve thung chuan formal lam kan ṭhui hnemin puan plain lam kan customer-te duh ala ni fan a, chei leh lace lam kan khawih lo deuh tawp a, nu upa lamah tunhnaiah a par an uar thar leh a,
ṭhalai deuh hlekah erawh nghawng chip lam kan uarin in-cut sawm leh a hnung design awm kan khawih tam ber a tih theih awm e. Drawstring, bell sleeves ban design hrang hrang customer lamin an ngaina viau bawk. Ṭhalai lam erawh crop top leh pencil dress an la kal pel hlei thei lo. Tunhnai te aṭang khan skater dress/skirt an rawn uar chho viau bawk. Draping leh pleats (thleh thlur) lamten design-ah hmun an chang chho mek zel a ni.

Chanmari kawna rawn insawn thar Engmawia Escape erawh chuan floral, a par lam a customer ten an uar thu leh net (lang tlang) ang chi ho an khawih nasain, tlem deuh laia bead works vel kan uar ṭhin kha hand embroidery khawl la hmanga chei an uar thu min hrilh. A tlangpuiin a customer ten off white lam leh van rawng leh tuipui rawng pawl dal da riai lam te an rawn duhin, casual lamah kurta an ṭhui nasa a, formal leh casual an ṭhui tam dan a inang.

Designer zawng zawng kan ziak seng lo ang a, amaherawhchu tuna kan hmuh theih chinah pawh Mizo ṭhalai, nu valai leh nuho tena kan uar leh ngainat chu a hriat theih mai awm e. A tlangpuiin kan hnam ziarang tel ang chi thawm­hnaw hi ram pawn a kan unaute hian an hlut zawk emaw ni chu aw tih turin traditional dress leh top ho hi ram pawn lamah kan thawnchhuak hnem zawk zel a ni.