Brian 'Head' Welch Korn-a a let leh chhan a sawi

Nu-metal band hlawhtling, Korn-a an guitarist, Brian 'Head' Welch chu piangtharin, hun eng emaw chen missionary hna thawka India ramah te a awm hnuah Korn a zawm leh a, mite mak tih a hlawh hle a, Kristian tam takin zawhna an zawt a ni. Hun eng emaw chen a band hlui a zawm leh chhan a sawi loh hnuah tunhnai khan a chhan a sawi chhuak.

Kum 2005 khan Head hian Korn hi a chhuahsan a, kum riat zet a chhuahsan hnuah a kir leh a ni. Guitar World chuan khawvela guitarist
ṭha a thlanna, 100 Greatest Heavy Metal Guitarists of All Time-ah pawh a lang pha a ni.

Brian chuan, "Party boruak leh a huau huau chin chauh hi metal music ni ta se chuan ka kir leh hauh lo ang," a ti. An hun hmasa leh tun huna music khawvel a danglam tawh hle tih a sawi a, ruihhlo nena tih bung bung boruak ang reng kha chu la nise chuan a tel tawh miah lo ang a ti a ni. "Tunah chuan boruak a danglam tawh hle a ni. Mi ṭhenkhat chuan nupui fanau an nei tawh a, an fate nena hun hman te an duh a ni. 'Kan crew te hi chhuahtir ang u, backstage-ah hmeichhia an awm' tih ang boruak kha tunah chuan khawvel hian a kal pel ṭan tawh. Mite hian an chhungkua an ngai pawimawh tawh a, an nupuite nena inṭhen mai mai an duh tawh bik lo. Pa ṭha tak nih an duh vek tawh a, anmahni leh anmahni intihchhiat hi an duh tawh lo a ni," a ti.

Brian hian kum riat zet a band, Korn a chhuahsan hnuah a fanu avangin an zaina concert-ah a kal a, chuta ṭang chuan inpawhna ṭha an siamho leh tih a sawi. "...Concert-ah chuan a tawpah Korn an zai a, chu concert-na hmunah chuan ka awm ve tih an hriatin min ko chhuak a, mipuite bula kal tur leh autograph te ziak turin min ti a, ka hnar a ni. A hnuah 'Blind' kha sak a, guitar min perhtir an tum a, ka hnial ta lem lo a, chuta ṭang chuan kan inbe zui a, ka lut leh ta a ni," a ti.

A nun kal tawh a sawi a, Korn a chhuahsan hma kum hnih vel aṭangin methamphetamine a ti chho ṭan a, a ti zel a, a hnuah phei chuan ni tin meth a ti ta hial a ni. Bansana nghei ka duh em em a, ka thei si lo. Rehab-ah te ka lut a, ka nghei thei chuang lo. Zan khat chu ka ṭawngṭai a, 'Lalpa, i awm tak tak a nih chuan ka ruihhlo ngaih hi min lak bosak teh. Ka hneh theih nan min pui la, keimah hian nang lo inpuang ang che,' tiin ka ṭawngṭai a," a ti a, a hnu kar hnih lekah chuan Pathianin ṭhian pakhat hmangin min pui a, ka nghei ta mai a ni," a ti.