MJA member-te'n Folkland an tlawh

MJA member-te chuan Inrinni khan Falkland Venga intihhlimna hmun tur siam mek 'Falkland' an tlawh a, thawktute'n an thil siam hrang hrang leh an siam chhante an hrilhfiah.

Falkland enkawltu Matthew Remtluanga Sailo, Zarkawt chuan hmun hrang hranga an kalnaah intihhlimna hmun ṭha tak tak a awm chu Mizoram tan an awt ve ṭhin tih sawiin, "Mizote hian intihhlimna hmun tur kan nei lo hle a, hei hi sualna pun chhante pawh niin kan hria. Chuvangin, thianghlim taka intihhlimna hmun buatsaih hi kan tum a ni," a ti.

An thil siam Falkland tih an vuah chhan sawiin Mathew Remtluanga chuan, "Pipute aṭanga thil inhrilhchhawng ṭhin kan ni a, kan culture-te kan inhlanchhawn a, kan inpekchhawn zel theihna atan a ni," a ti a, an thil siamah pawh a theih chin chinah Mizo thil an hman thu a sawi.

Falkland-ah hian car intlan≠siakna (Go-Kart), football khelhna (futsal), cafetaria, conference hall, movies enna hmun, laser hmanga indona leh children park-te a awm a, thawh hnihnaah thil dang eng emaw zat siam belh an tum a ni. Thawh khatna bik hi hun rei loteah mipui tlawh theih tura hawn tum a ni.