New York-a thlalatute zingah James keivom Thla la thiam berah an thlang

New York-a photographer pawl, New York Press Photographers Association (NYPPA)-in thla la thiam ber an thlan chhuah zingah Mizo tlangval a tel hi beisei ngai miah loh ni mah se, tunah chuan Mizo tlangval ngeiin NYPPA Photographer of the Year a dawng thei hi a neu lo!

Ziaktu lâr L Keivom (IFS Rtd) fapa, James Lalropui Keivom chu NYPPA-in Photographer of the Year an thlan dawngtu a ni. New York khawpui chhungah leh a chhehvelah ringawt hian photographer mai bakah, paparazzi leh photo journalist mi tam tak, eizawn nana hmanga an thiam tinreng nena bei mi tam tak an awm, chung zingah chuan Mizo tlangval James Keivom chu thiam ber a ni tlat.
Thawhṭanni zan khan NYPPA hian thlalak lama chawimawina an siam hrang hrangte an sem a, hetah hian James Keivom hi Photographer of the Year-a thlan a nih bakah, Spot News leh Best of Show chawimawina a dawng bawk. Hei bakah hian thlalak lama chawimawina hrang hrang dang sem a ni a, Sports Photographer of the Year-ah Getty Images-a thawk, Al Bello thlan a ni. Spot News-ah James hi pakhatna a ni a, Daily News-a thawk Debbie Egan-Chin chu pahnihna a ni a, Daily News-a mi bawk Todd Maisel chu pathumna a ni. Debbie Egan-Chin hi James-a thawhpui a ni.
James-an Photographer of the Year a dawnna hi Ferguson, Missouri-a mihang pakhat police-ten an kahhlum avanga buaina chhuak zuia a thlalak hmangin a ni a, Spot News-a pakhatna a dawnpuina thlalak hi Staten Island-a protest a awm laia gas puak aṭanga an him nana Eric Garner-an a fa a tlanchhiatpui lai thla a lak aṭangin a ni. Hengte leh a thlalak hrang hrangte aṭangin Phtographer of the Year lawmman hi a dawng. (Dinglam thlalak: Staten Island-a a lak)
James Keivom hi tunah hian New York Daily News-ah photographer-in a thawk mek a, kum 10 vel lai a thawk tawh.