ZONET ṬHAZUAL AWARD 2020 Zaninah Lengzem award sem a ni dawn

Zonet Ṭhazual Award Gospel chu nizan lam khan sem fel a ni tawh a, zanin dar 8-ah hian Lengzem award sem a ni ve leh dawn.

Hripui a leng a, kumdang angin award sem boruak a hot thei lo. Chutih rual chuan kuminah hian award dawng thei tura chhawp chhuahte an ṭha hle a, Mizo zinga zai lama a ber ṭhiau thlan chhuah zingah hian tuin nge chawimawina dawng dawn hriatthiam pawh a harsa hle.

Lengzem huangah hian category pakhat aia tama nomination hmu an awm nual a, pakhat aia tam award hum haw an awm thei dawn em tih chu zanin hian kan hre dawn a ni. Ṭhazual Award hi thla hmasaa sem tura ruahmanna siam vek tawh kha niin nomination puanna pawh a rei tawh. Hripui leng vangin ruahmanna hmasa a tlawlh hnuah sem a ni thei ta a, nizan lamah khan Gospel artists-te pualin hum hman a ni tawh. Zanina Vanapa Hall-ahLengzem artist-te puala hun hman leh tur hi a hmunah award dawng turte bak an kal theih dawn loh avangin in lam aṭanga lo thlir leh a ngai dawn a, Zonet Zawlbuk bakah Zonet YouTube channel-ah live-in pek chhuah a ni ang.

Lengzem artist Zoram mipuiin kan ngainat em em Feli Fanai chu Best Female Artist-ah nominee a nih bakah a music video thar 'Chhingmittui a hul zo ta' hmangin Best Music Video category-ah nomination a hmu bawk.

Zorinzuali Khiangte pawh Best Female Artist category-ah a hming a lang leh a, a music video 'O' hmangin Best Music Video category-ah a hming a lang bawk a ni. KR Robert ft. Tuaisiala-te pawh category pakhat aia tama award dawng thei din­hmun­ah an ding a, Best Music Video leh Best Group/Duo category-ahte nominee an ni a, Awmtea Polymer chu Best Male Artist leh Best Group/Duo category-ah a hming hmuh tur a awm ve bawk.

Rpa Ralre pawh Best Male Artist-ah nominee a nih piah lamah Best Songwriter-ah nominee a ni bawk a ni. 'I hlutna' hitmaker Jaui hming chu Best Female Artist category-ah a hming a lang a, a hla 'I hlutna' phuahtu Hmachhuana Khiangte chu Best Songwriter award dawng mai thei dinhmunah ding ve thungin category pahnihah a hming lang chiah lo mah se a hming leh a hla chu category hranah an lang.

HT Lalthanzami pawh Jaui ang bawk hian Best Female Artist cate­gory-a a hming a lan bakah hian a hla 'Ka thai tluangte' phuahtu  LV Chawngthu chu Best Songwriter award dawng thei tur zingah a hming a lang bawk. 

Perform tur an ṭha 

Zanin hian zai tur an ṭha dawn hle. Grace 10:45, Jojo, Feli Fanai, Sangkimi Khiangte, Awmtea Polymer, Keimah Senes & Tlangval Tlumtea leh Mood Station bakah Zaii Hauchhum-te an perform dawn.

Awmtea Polymer phei hi chu a hla eng emaw zat YouTube-a million view nei thei a ni a, Feli Fanai live-ah pawh a hmuhnawm ṭhin tih kan hre tlang a, Keimah Senes & Tlangval Tlumtea-te pawhin 'Sawnu saw a hmel a ṭha' an thlawh mai thei a; Lammual tuipui fawntir thei Mood Station an che dawn bawk, a hot lo thiang lo a ni tawp. Hripui a leng erawh a pawi a, a hmunah chhimtu an awm thei dawn si lo a, in lam aṭangin kan lo 'hot' hle tawh mai a niang chu.