Fela Colney & Temami-te 'Beisei bo' a bo lo

Ṭhazual Lengzem Chart-ah Fela Colney & Temami-te hun a thleng ve ta a, an hla 'Beisei bo' chu pakhatna an nihpui a, Jaui 'I tan chauh' chu pahnihna niin TC Tetea 'A rem lo maw' chu pathumna a ni.

Fela Colney & Temami-te hla thar 'Beisei bo' chu a bo lo mai ni loin pakhatna hial a ni ta a, chart-a a hmel inlannna a rei tawh bawka pakhatna a ni pawh hi a awm viau. 

He hla mawi tak V.L. Awia phuah hi Zaithanmawia, T.Melody-in thiam taka a lo sak tawh ṭhin kha niin Fela Colney leh Temami-te hian thiam tak maiin an rawn thar thawh leh a, an tlangzarh aṭanga thla hnih vel a liam hnuah chart-ah No.1 a rawn ni a, chart top 5-a an lanna phei chu a rei tawh hle.

Video a hmuhnawm a, a satute'n an sa thiam bawk nen 'Beisei bo' hi thlira ngaihthlak a manhla hle a ni.

Tunlai Mizo lengzem artist zinga huhang ngah ber pawl Jaui hla catchy tak 'I tan chauh' chu pahnihna a rawn ni ta a, chart hmasaah khan parukna niin, tun chart-ah hian pahnihnaah a rawn invawrh dawrh mai a ni.

Jaui hi chart lehah pakhatna a nih pawhin mi tam takin mak an tih a rinawm lo a, a hmasawn chak dan en hi chuan pakhatna a ni thuai ngei dawn niin a lang.

Tunṭum Ṭhazual Lengzem chart-ah hian inlan thar an tam hle a, chung zinga chuan zaithiam langsar KR Robert, Awmtea Polymer, Chhanhimi leh Ruatpuii-te pawh an tel a ni.

1    Fela Colney &Temami     - Beisei bo

2    Jaui     - I tan chauh   

3    TC Tetea     - A rem lo maw

4    Hoxy     - A beidawng lo

5    Manuna     - Vawng reng nang e

6    HT Lalthanzami     - Rauthla zun

7    KR Robert    - Beiseina beidawnthlak

8    Awmtea Polymer     - I Phone kha la rawh

9    Chhanhimi     - Hliamhnu hmangaihna

10    Ruatpuii     - A dawn phak lo