K-Town Blackpink concert i chhim thei dawn!

Jisoo, Jennie, Rosé, leh Lisa-te concert chu khawvel hmun dang rualin i chhim thei dawn a, mahse a thlawn erawh chuan a ni dawn lo thung; i chhim duh a nih chuan a man i pek a ngai dawn.K-pop quartet hian Nilaini khan an live-stream concert hmasa ber an nei dawn tih tarlangin hemi atan hian YouTube Music an thawhpui dawn tih an sawi bawk.

An virtual concert neih tur hi a hmingah 'The Show' an vuah a, Krismas ruai ṭheh ni, December 26 hian concert hi an nei dawn a ni. Concert an neih hun tur hi Pacific Standard Time (PST)-ah chuan zan dar 9-ah a ni dawn a, EST-ah chuan hei hi December 27 zing dar 12 niin keini ramah chuan December 27 chawhma lam dar 10:30 velah a nih hmel.

Thla hnih vel liam taah khan Blackpink hian an album 'The Album' an tlangzarh a, hripui a len avangin an album thara hlate hi Blink ho hmaah an la perform hlei thei lo. Billboard chuan December 26-a virtual concert an neih tur hi 'The Album'-a hlate an perform-na hmasa ber tur niin an tarlang.

"Dawhthei taka min nghaktu Blink-te tan kum tihtawpna atan thil special tak tihsak kan  duh a ni," tiin Blackpink chuan thuchhuah an siamah tarlangin an live-stream concert hmasa ber chu tupawhin hlim taka an en theih an beisei thu an sawi.

Anni pawh hian The Show an buatsaih tur hi an phur tawh hle tih sawiin an YouTube channel aṭangin ticket a lei theih reng tawh. Standard pakage chu Rs 2,399 man niin hemi hmang hian livestream i en theih dawn bakah rebroadcast leh custom emoji-te a hman theih a, plus package erawh Rs. 3,199 man niin behind-the-scenes content a en tel theih dawn thung. December 4 hian an livestream chungchang hi chiang zawka la tarlan leh an tum a ni. The Show trailer pawh hi YouTube-ah an dah chhuak tawh nghe nghe.