Zirtirtu Jolie-i

May thla khan London School of Economics-ah Angelie Jolie chu visiting professor a ni dawn tih an puang chhuak a, hetiang a nih takah chuan zirna hmun dangte pawhin Jolie hi an zirtirtu ni ve zawk turin an lo duh hlawm. Chung zingah chuan Washington DC-a zirna hmun ṭha pawl, Georgetown University-ah visiting professor turin an beisei ve leh a, mahse an beiseina erawh tihhlawhtlin a ni lo ang.

Georgetown University thupuangtu, Rachel Pugh chuan zirlaiten an beisei ve viau nachungin ruahmanna an siam ta lo mai tih a sawi. Jolie bakah British Foreign Secretary, William Hague te chu London School of Economics-ah hian visiting professor-in, tun favang
aṭang hian an thawk ṭan dawn. An zirtir tur chu Women, Peace and Security a ni a, indona hmun hrang hranga hmeichhiate dinhmun chungchang a ni ang.