NETFLIX kutah Zendaya channa 'Malcolm And Marie'

Zendaya Coleman leh John David Washington-te channa Sam Levinson-a film 'Malcolm & Marie' neitu nihna chu Netflix kutah a awm niin Deadline chuan a tarlang.

Deadline-in an tarlan dan chuan film siam­tute leh Netflix hian hemi atan hian inremna $maktaduai 30 hu vel an ziak a ni. 'Malcolm & Marie' film producer leh writer Levinson pawhin thuchhuah a siamah hemi chungchang hi a tarlang a, ani erawh hi chuan inremna an ziah hun chu a sawi lang ve lo thung.

Film changtu leh crew-te chu a hlimna thlengtu a chhungte an nih thu leh an chunga a lawm thu a sawi a, khawvel hmun hrang hranga mite'n an en theih tura Netflix kuta a awm ta chu lawmawm a tih thu a sawi bawk.

He film-ah hian John David Washington hi filmmaker lar Malcolm lemah a chang a, Zendaya hi a ngaihzawng lema chang bawkin film premiere lawm tura an inbuatsaihna kawngah an inkarah boruak ṭha lo tak a inmung chho vel dawn niawm tak a ni.

American drama film hi lockdown zual lai, June 17 aṭanga July 2 inkar vel khan Carmel, California-ah an chang a, Zendaya leh John David-te pawh hi executive producer an ni nghal bawk.

Toronto International Film Festival-ah Netflix hian inremna hi an siam­pui a, he hunah hian streaming giant hian  Halle Berry film direct hmasak ber 'Bruised' bakah Vanessa Kirby leh Shia LaBeouf-te channa 'Pieces of a Woman'-te pawh inremna an siampui a ni.

Netflix hian tunhnaiah ṭan an la nasa zual hle a, tunhmaa film hlui ṭha tak tak tam tak chu inremna siampuiin an streaming platform-ah en theihin a awm tawh. Disney+ leh Hotstar bakah HBO Max-te nena an inelna kawngah hma an sawn hle a, tunah chuan kan awmhmunah kan mobile phone hmangtein heng streaming platform hrang hrang kaltlang hian movie kan duhzawng awmsam takin kan en thei tawh a ni.