'Blowin' in the wind'

Abraham Lincoln-a'n sal chhuahna thu puang chhuak tawh mah se, Indopui II zawh hnu thleng pawh khan US-a midum awm­te chu an la zalên lo pawh ni mai loin, hnuaichhiah leh enhran an la hlawh nasa hle. Restaurant-ah lah nise mingo zingah thil an ei ve thei lo a, mihâng tan a hranpa an siam ṭhin. Tui inna no inhman pawlh pawh mingoten an duh lo. Chu­tiang boruak leh inenhranna chu a bo theih nan mihâng leh anmahni khawngaihtu mi tam takten hma an la a, kum 1954 aṭang khan Civil Rights Movement a chhuak ta a ni.

Civil Rights Movement-a an hruaitu langsar tak chu Martin Luther King Jr. kha a ni. Aniho khan nasa takin zalênna an sual a, chutianga zalênna an sualnaa hla hriat hlawh, mi tam takte phurna leh chona petu hla chu 'Blowin' in the wind' hla hi a ni.

'Blowin' in the wind' hla hi kum 1962-a Bob Dylan-a phuah a ni a, a tir chuan he hla châng khatna leh châng thumna chauh hi a phuah a, a hnuah châng hnihnaa an dah tak hi a phuah belh leh a ni. Protest hla berah an hmang nachungin Bob Dylan hian he hla hi hetianga hman atana a phuah a ni hauh lo thung. "Hetah hian protest song emaw chutiang lam chi hla a awm lo. Protest hla hi kha phuah lo a ni," a ti. Mahse a hla thu nen hian a lo inrem deuh bawk avangin midumten zalênna an neih theih nana an beihnaa an hla thulkhung zinga mi a ni.

He hla chungchanga hriat belh tur tam ber chu mi hrang hrangin an hrilhfiahna hi a ni. A hla châng khatna tlar hmasa pahnih 'How many roads must a man walk down before you call him a man?' tih hi mi tam tak chuan America chhim lama midum ten enhranna an tawh a bo theih nana kawng an zawh a sawina niin an sawi. Hei bakah châng hnihna tlar thumna leh tlar lina te pawh hi Civil Rights movement aṭanga a phuah liau liau niin an sawi bawk.

Bod Dylan hian a hla thu tam takah Bible ṭawngkam emaw, Bible lam hawi a hmang nasa niin an sawi a, 'Blowin' in the wind' hlaah pawh hian chutianga an sawi chu kan hmu. 'How many seas must a white dove sails before she sleeps in the sand' hi Nova chanchina
ṭhuro a chhuah ṭawngkam aṭanga a chher a ni a, châng thumna - 'Yes, and how many ears must one man have before he can hear people cry?' pawh hi Ezekiela 12:1-2 aṭanga a lak chhuah niin Michael Gray chuan a sawi.

He hla hi kohhran pawmzau tak tak
ṭhenkhat chuan biak inah hial an sa ṭhin. Kum 1997 khan Catholic kohhran ṭhalai khawmpui pakhatah Bob Dylan hian a sa a, khatihlaia pope, John Paul II chuan, "A chhânna chu Thli-ah chuan a awm teh meuh a, chu thli chu thil lên bo ṭhin thli ni loin, Thlarau Thianghlim, pneuma, zawk a ni," a ti. Kum 2007 khan Pope Benedict XVI chuan Bob Dylan chu he hla saa kohhran ṭhenkhattena an sawm ṭhin ṭha a tih loh thu a sawi.