2020 ACM Awards-ah Taylor Swift a perfom dawn

Tunhnai kum 10 chhunga khawvel zaithiam zinga huhang ngah ber nia sawi hial ngam tur, Taylor Swift chu a pianna ramah a kir leh dawn.

Swift hi kum sarih chhung lai chu  Academy of Country Music Awards-ah a peform tawh lo a, mahse kuminah erawh a perform dawn tih Pathianni khan Academy of Country Music leh dick clark production-te chuan an sawi.

55th Academy of Country Music Awards semna hi Nilaini hian Grand Ole Opry House-ah neih a ni dawn a, award semnaah hian Swift hian a album thar Folklore-a mi 'Betty' a sa dawn a, kum sarih chhung zet ACM Awards stage-a a din tawh loh hnuah kuminah erawh a ke a rawn nghat dawn a ni.

Pop music a luhchilh tak tak hma hian Billboard Woman of The Decade hian ṭum hnih ngawt  ACM's Entertainer of the Year Award a lo dawng tawh a, ACM award hrim hrim hi pakua lai a dawng tawh. 

Tunhmaa a lo ropui tawhna ṭhin rama a kir leh tur hi khawthlang media lamte pawhin uar takin an tarlang hlawm. Country aṭanga pop music lama a luhchilh hnu pawhin Taylor Swift hi a hlawhtling em em zel a, July 24-a a album tlangzarh 'Folklore' pawh Billboard 200 chart-ah kar ruk ngawt No.1 a nihpui leh der tawh a ni.

2020 ACM Awards-ah hian country artist lar tak tak an perform nual dawn a, chung zingah chuan  Miranda Lambert, Kane Brown, Luke Bryan, Kelsea Ballerini, Luke Combs, Florida Georgia Line leh Tim McGraw-te pawh an tel. Keith Urban chu host a ni dawn bawk.