Ram kang tuartute tan Hollywood star-te che chhuak

Los Angeles-a ram kang nasa tak avangin chenna in leh building dang 1,000 chuang a kang chhe tawh a, mi nuai 1.3 vel sawn chhuah an ni tawh bawk. Pacific Palisades, Hollywood Hills leh Eaton Canyon ahte kangmei hi a chhuak tawh a ni. Kangmei chhuak tuartu zingah hian celebrity lam pawh eng emaw zat an tel a, Paris Hilton, Jhene Aiko leh Heidi Montag-te pawh an in chan zingah hian an tel.

Harsatna tawkte tan Hollywood star-te an rawn che chhuak ṭan. 'Basic Instinct' actress Sharon Stone chuan kangmei tuar, an in leh chhuahsante ngaite tan an awm lailawkna turin a in a lo hawng a, chhungkaw eng emaw zat an inthiar lut a ni. Hei bakah hian a laizawnnu nen Beverly Boulevard-ah The Coop dawr siamin, he dawr hi kangmei chhuak tuarte ṭanpuina semna atan leh, donation thawh duhte tana thawhna turin an hmang a ni.

'Freaky Friday' star Jamie Lee Curtis leh a pasal, Christopher Guest te pawhin harsatna tawkte tan USD mtd 1 an thawh dawn tih an puang. Curtis chuan aid organisation hnena donation pe turin mipuite pawh a ngen zui bawk. Curtis hian Pacific Palisade-a an venga inte chu a kang chhe nasa hle a, a in erawh a la him tih a sawi.

Los Angeles-a ram kangin chhiatna nasa tak a thlen leh, mi sing telin harsatna an tawh mek avangin, Oscars pawhin 2025 nomination puan hun tur a sawn hla. Oscars nomination hi January 17-a puan tura ruahman a ni a, mahse January 19-ah sawnin, vote theih hun pawh January 14 thleng a pawtsei a ni. 97th Academy Awards hi March 2, 2025 hian neih tum a ni. January 8-a Intertional Feature Film Shortlist Screening neih tur pawh a lo ṭhulh tawh a, neih hun tur hi a la puang thar leh dawn a ni. Hollywood event neih tur eng emaw zat pawh kangmei chhuak vang hian ṭhulh leh sawn hlat an ni hlawm.