Alia Bhatt-Ranbir Kapoor te inneihna ven hna a hautak

Bollywood celebrity te inneih hi an ti ropuiin umzui pawh an hlawh ṭhin hle. Chim buai lo tura ngenna an siam chung leh, security lam theihtawpa an ti chhah chung pawhin media leh fan-ten an theih ang angin an bawrbuai reng thung. Celebrity security consultant Yusuf Ibrahim chuan tun hnaia interview a neihah, celebrity inneihnaa venhim hna an thawhah Alia Bhatt-Ranbir Kapoor te inneih kha ven a hautak ber thu a sawi.

Alia Bhatt leh Ranbir Kapoor hi kum 2022 April thla khan Mumbai-a Pali Hill residence-ah an innei a, an theih anga an zep chungin media lam mi 350 vel leh fan ṭhahnem tak chu an building kawtah an pungkhawm a, inneihna hmang tura sawmte tan pawh luh harsa khawpin kawng an hnawh niin Ibrahim chuan a sawi. Ni ruk chhung chu he building ven hna hi mi 60 awmna teamin an thawk a, heti chung hian media mi eng emaw zat banga lawn liam ṭalh tumte an awm a ni, a ti. Hei vang hian guard ṭhenkhat chu civil mi anga inthuamin, thil awmdan thlithlai turin an dah tel tih a sawi bawk.