Eminem Lalropuia tiin kan ko ngam ang

Hla mal, copy maktaduai khat hralh hi thil harsa tak a ni a, copy maktaduai 10 hralh phei chu har lehzual tak a ni. Album-a awm a nih leh lek phei chuan a album lei khan kan lei tel a ni nghal si. Mahse Eminem tan erawh thil harsa a ni lo a, a hla, Not Afraid hla kha copy maktaduai 10 zet a hralh tling ta. Hei vang hian Recording Industry Association of America chuan diamond certificate pahnih an pe.

Rihanna nena an sak, Love The Way You Lie kha a hit em em a, mahse Not Afraid erawh a tluk pha lo. Love The Way You Lie kha diamond certificate pakhat pek a ni. Hengte bakah hian Eminem hi a ropui a tih loh theih lohna dang leh chu a album pahnih ngawt maiin diamond pahnih an hmu thei hi a ni. Marshall Mathers LP leh The Eminem Show te kha copy maktaduai 10 chuang ve ve a hralh a ni.

Not Afraid hla hi Eminem-a album pasarihna 'Recovery' album-a mi a ni a, Eminem, Boi-1da, Jordan Evans leh Matthew Burnett tena an phuah leh produce a ni. Eminem hla zinga positive zawnga sawizui hlawh nasa pawl a ni ngei ang. Los Angeles Times chuan, "He hla hi miin a vawi khat nan ngaithla ta se, Christian hip-hop emaw an ti ngei ang," a ti hial. Musician tan he hla hi C Minor a ni a, a tempo hi 86 beats per minute a ni.

Tihchhuah a nih aṭanga kar khat chhungin digital bikah copy 380,000 zet hralh nghal a ni a, Eminem-a hla zingah digital-a kar khat chhunga hralh chhuah hnem ber a ni.

Not Afraid hi a hralh lamah chauh ni loin, music khawvela tehna hrang hrangah pawh a hlawhtling. He hla hmang hian kum 2010 MTV VMA-ah Best Male Video leh Best Hip-Hop Video a la a, kum 2011 Grammy-ah khan Best Rap Solo Performance a la bawk. Hemi kum vek hian MTV VMA Japan-ah Best Hip-Hop Video a la.