Zo rimawia mi ropui Joseph Zokunga Saja kan chân
Mizote rimawi khawvela sawi bân theih loh tur mai ni lo, a sulsutute zinga mi, Joseph Zokunga chu Ningani chawhma dar 9:15 khan Nazareth Hospital-ah chaw kawng cancer natna avangin kan chân ta. Vawiin hian Laipuitlanga an inahvui a ni ang.
Joseph Zokunga hi Saitawna Saja leh Parkimi Ngente fa hmasa ber a ni a, kum 1948, October 24 khan Dhaka, Bangladesh-ah a piang a, chumi hnuah Sikkim-ah an pem chho a ni. Kum 1962-64 chhung khan Kalimpong-ah school a kal a, hetihlai aṭang tawh hian music hi a buaipui hle tawh a, a school kalpui sap naupangte nen 'The Stranger' band an din a, hetah hian amah hi a khaipa ber leh an vocalist a ni.
Kum 1965 khan Aizawlah a lut a, hetih hunlaia Aizawl mipuiin an hriat dan ber chu Italian hla leh Elvis-a hla a sak aṭangtein a ni a, chutihlaia hall lian ber, Aizawl Theatre Hall (Vanapa Hall ni ta)-ah function pawimawhah te a zai ṭhin.
Kum 1967 khan Rosangliana hoin Shillong-ah The Agents an din a, hetah hian Joseph Zokunga, hian bass guitar a chan bakah an vocalist a ni a, Remmawia Vanchhawng chu lead guitarist niin, Thanliana'n rhythm vocal a chang a, James Kaia chu drummer niin, Vanhlupuii chu guest singer a ni. An band hi Assam thingpui huana saphoten an ruai nasa ṭhin hle. Assam thingpui huana an zai chu The Beatles-a an drummer Ringo Starr thlaktu ni ta, Pete Best khan a lo ngaithlaa thiam a ti hle a, a guitar Hofner chu Joseph-a hi a leitir a, ani hian a roh hle.
Kum 1970 khan Moral Re-armament band a zawm a, khawvel hmun hrang hrang - Europe, Asia, America, Canada, Australia te an fang . Kum 1974 khan Song of Asia Musical Drama-ah director niin, ram hrang hrang 24-ah a team-te nen an kal chhuak a ni. Kum 1976 khan Mizoramah a rawn kir leh a, Mizoram sorkar chuan Institute of Music & Fine Arts-ah enkawltuah a hmang a, kum 2013-a a pension thleng khan a thawk zui ta a ni. Mizorama a rawn kir hnu, kum 1977 khan The Messengers band an din a, he band hi rock opera a ni a, musical drama (opera) pawh an buatsaih nual. An opera siam, The Prodigal Son phei chuan khatih hunlaia Mizoram Synod Choir khan an zinna hmun hrang hrangah an chang/sa nasa hle a ni.
Kum 1978 khan Sweet Combination an din a, he band hian kum 1980 khan beat contest-ah pakhatna an la a, he band-ah hian Vanhlupuii te, Vanlalruati te, Bobby Dingluaia leh Ngurbiakthang te pawh an tel.
Mizo ṭawng tak hian Baba hian hla a phuah meuh lo a, a pa hnathawhna avanga Mizoram pawna seilian a nih avangin Mizo ṭawng hi a duh ang thâlin a thiam lo deuh. Hla thlûk erawh a siam hnem hle a, a hla thlûk siam tam tak chu tun thleng pawha hla lar an la ni. Vanlalruati pasal nei tur uina hla 'Zoawi lelte' tih te kha a hla thlûk siam zinga mi a ni a, hei bakah hian Perhkhuang zaitin thiam, Kar hla ṭhian, Hraichawi leng tihte hi kan hriat lar zualte an ni.