Muse-ho Drones a hlawhtling

US-a Billboard album chart lamah chuan Muse-ho album thar, Drones chu a hlawhtling hle a, tunah hian pakhatna a luah mek. He album hi British rock band, Muse tan chuan album hlu a ni ngei ang, kum 20 chhunga Billboard-a pakhatna hauh thei hmasa ber an album a ni.

Nielsen Music-in an tarchhuah danin, Muse album Drones hi kar khat chhungin copy 84,000 hralh a ni a, heng zinga copy 79,000 chu album pangngai a ni. Muse hian kum 2012 khan, an album The 2nd Law hmangin Billboard album chart-ah hian pahnihna an lo ni tawh.

Billboard album chart-ah hian Taylor Swift album 1989 chu pahnihnaah a la awm cheu a, kar khat chhung khan copy 64,000 lai an hralh leh. Pathumnaah Of Monsters and Men album Beneath the Skin chu awmin, tunkar chhung khan copy 61,000 an hralh.