'The Passion of the Christ' chhunzawmna title ti chiang tawh

Mel Gibson chuan 2004 blockbuster, Biblical movie 'The Passion of the Christ' chhunzawmna tur film hming atan 'The Resurrection of the Christ' tih a ni dawn a, kum 2026-ah an chang ṭan dawn tih a sawi.

Kum 2016 aṭang khan 'The Passion of the Christ' chhunzawmna tur hi buaipui ṭan niin, a script hi Gibson chuan kum sarih chhung a unaupa Donal leh 'Braveheart' writer Randall Wallace te nen an buaipui tawh a ni. Gibson chuan a script ziah hi a hautak hle tih a sawi a, Isua Krista chanchin, tih hlum a nih hnua a thawhlehna chanchin chiang taka tarlang tur chuan, angel paihthlak a nih aṭanga ṭan a ngai a, hremhmunah, Seol-ahte kal a ngai a ni, a ti. 'Passion' star Jim Caviezel bawk chu Isua lemah a chang leh dawn tih sawiin, a film hmasa tih chhuah aṭangin kum 20 liam tawh mah se, a chhunzawmna turah hi chuan a film hmasa thawnthu aṭang khan ni thum chauh a la liam dawn a ni, a ti. An inbiaknate pawh mi tam zawkin an hriatthiam theihna turin Hebrai/Aramaic ni loin English hman a ni zawk dawn tih a sawi. Gibson chuan Isua thawhlehna ringtu a nih thu leh, a rinnain zu ngawlveina aṭanga a talchhuahna kawnga a puih dante pawh a sawi bawk.