Parema album A tihchhuah hun a chiang

Hla phuah thiam, R. Lalremruata, Parema tia kan hriatlar chuan a hla phuah dahkhawmna tur album tihchhuah hun tur a tichiang a, August 25 khian Vanapa Hall-ah a tlangzarh ang.

Parema album hi 'Ka vui lo Lalpa' tih a ni a, album tlangzarhnaah hian zaithiamte an zai ang a, sound hi Delta Sound-in an buaipui ang. Parema hian a album hi a duh angin a buaipui chak thei lo a, amah hi cancer avanga enkawl ngai reng a ni. Chemo-te an lak ṭhin avangin hun a neih loh bakah, a taksa a chak loh ṭhin avangin a duh anga chakin a thawk thei lo a ni. Chemo a lak leh hmain a album hi a tichhuak dawn ta a ni.

He album-ah hian Mizo hla panga a awm ang a, Hindi hla pathum leh English hla pahnih a awm ang. Hindi hla hi Vanlalsailova leh Pensy-i ten an sa dawn a, ngaihthlak a chakawm viau. Parema chuan, "Hindi hi ka ziak thiam lo a, mahse kan naupanlaiin Mizoram pawnah te kan awm avangin a ṭawnga ṭawng hi chu ka thiam," a ti a, "Kan kohhranin hnam dang inkhawmpui kan thlen ṭumin Hindi hlaa Pathian fakna sak tur ṭha, ṭhalaitena an sak theih tur a tam lo hle mai a," tiin a phuah dan a sawi. "Tichuan tlai khat chu ka rilruah Hindi hla a rawn lut a, Pathianin min pe a, Mizo hawrawpin ka ziak mawp mawp a, a hnuah Devanagiri hawrrawpin midang ka ziahtir leh a ni," a ti.

'Ka vui lo Lalpa' album-ah hian Pensy leh Vanlalsailoa bakah tunlaia group lar tak One in Christ te, Fiona, Bethsy leh TBCA ten Mizo hla an sa ang a, English hi Mawitei leh Rinzuali Ralte te an sa ang. Rinzuali Ralte hi amah Parema fanu a ni.

Parema hian hla ṭhahnem tak a lo phuah tawh a, chung zingah chuan Mizoram puma kan sak lar leh KṬP General Conference Hla Buah pawh an dah 'Phuloh Hmangaihna' leh 'Thup hlen theih loh' te pawh a tel. A hla phuahte hi album-a dahin a tichhuak ṭhin a, pali lai a siam tawh a, a hnuhnung ber chu 'Ka rinchhan Lalpa' tih kha a ni.