Bihar police-ten chawlh lakah sorkar vau

Bihar Police-te chuan Station House Officer (SHO) 10 suspend-te chu sorkarin a hremna a sut lo a nih chuan lungawi lohna lantir nan a huho chawlh lak an tum.

Bihar state-in kumin April thla aṭanga zu khapna dan a hman hnuah SHO 10-te hi an bial chhungah dan kengkawh ṭha tawk loha puhin kar kalta Zirtawpni khan suspend an ni.

Police headquarters chuan an mahni police-te zingah hna thawk ṭha tawk lote dapchhuah hna beihpui a thlak mek a ni. Hetihlai hian Bihar Police Men's Associatio chuan August 28 hmaa SHO 10-te suspend-na hi sut a nih loh chuan a huhoin chawlh an la dawn tih an sawi. Association hian an thil phut chungchang hi state DGP PK Thakur hnenah pawh ziakin an thehlut bawk.

Bihar Police Men's Association president Mrityunjay Singh chuan, "DGP hnenah thil awmdan hi ngaihtuah ṭha tur leh, SHO 10-te hremna chu sut turin kan ngen a ni. Hetianga police officer-te chunga thiltih hian police force-ah ngei pawh hlauhthawnna a siam a, SHO tam takin an district SP-te hnenah an hna chu thlak sak turin an ngen a ni" a ti.

Police law hnuaiah nawrh huaihawt hi phal a ni lo a, hei vang hian association chuan August 28 hian meeting neiin, a huhoa chawlh lak chung≠chang hi an rel dawn a ni.

Hetihlai hian Bihar police hotute chuan thla li chhung an state-ah zu khapna dan an hmang tawh chungin, police officer an hrem takte chuan an bial chhunga dan loa zu siam leh zuarte chungah eng kawng mahin hma an la lo niin a sawi. Excise official-ten zu siam≠na hmanrua hi an man fo thung a ni.