Dj-in single thar buaipui leh Ṭan Ladi Steel-in palai atan an hmang dawn

Michael M Sailo nen 'Liam Mai Rawh' an siam hnu aṭang khan ama mimal pualin DJ Lalvenhimi hian single a la tichhuak lo a, tunah hian single thar tur a buaipui ṭan a, hma a la ṭan mek. Music lama hnuhma thar a neih mek lai hian iron rod lam siamchhuaktu, Ladi Steel Industries chuan ambassador-ah an hmang dawn a, indawrna pawh an tifel a, lehkha lam pawh an ziak fel tawh.

DJi chuan, "Keima pual hian single ka nei khât ta hle a, siam tumin ruahmanna ka siam a, ka buaipui chho ṭan chu a ni mai. 'Khua tuah loh di' kha keima pual liau liau ni loin, Zoremi Kawlni Collection-a mi a ni a, 'Ka tling lo' tih kha John Mawitea leh Mapuii Fanai te collection-a mi tur a ni bawk. Liam Mai Rawh kha duet a ni bawk si a, ka single pangngai tur hi ka buaipui leh ṭan a ni," a ti.

YMA Day, June 15 khan DJi leh Ladi Steel Industries te chuan inremna an ziak fel a, DJi hi he industry hian ambassador-ah an hmang dawn a, DJi hna ber tur chu Ladi Steel Industry tihlar leh fakmawi a ni ang. Hemi tur hian hoarding leh advertisement tur pawh Silchar-ah an shot a ni. DJi a lawm hle a, an palai tura amah an thlang chu a lawm a, chubakah a thawmhnaw inbel tur buaipuisaktu Engmawia, Escape chungah a lawm hle bawk.