Fashion Fiesta

Khawvel designer lar leh lian ṭhenkhatte chanchin kan rawn tarlang fo tawh a, tun ṭum pawh hi mimal taka ka ngaihsan leh mi bik, incheina khawvel sukthlek tidanglam dawrh khawpa mi danglam chanchin ziah a lang tlat; kan ziak leh poh a niang chu. A hmel hmuh phat aṭang hian mi dangdai tak a ni tih a hriat nghal hrim hrim. He pa zet hi zawng, a thluak a ṭhain a danglam a ni ang e, a mimala designer a nih hi chu thuhran nise, hmun khatah a awm hle hle thei lo pawh hi thilmak a ni lo e. Designing house lian tak takah a sulhnu hmuh tur a awm nual a, chung zingah Chloe, Chanel leh Fendi te a langsar zual a ni. A dangdaina tizual em emtu chu, heng Fashion House lian tea a thawh lai hian sawi hat tham khawpa design danglam a siamchhuak thei ziah leh a thawhnate a tilar vek mai hi a ni. Lu var vo mai leh kamis nghawng tung vah mai leh kutkawr, a signature look a inbel meuh hi chuan kum 80 a chuang tawh tih i ring bik miah lo ang.

Karl Lagerfeld hi Sept 10, 1933 khan Hamburg, Germany-ah unau hmeichhe pahnih karah lo seilianin, chhungkaw hausa tak mai an ni a. A naupanlai aṭang daih tawhin designing leh fashion lam hi a tui ve reng reng a, magazine-a milem leh thawmhnaw nalh deuh te chu a chep thla ṭhin a, a ṭhiante leh chhungte incheina chungchangah pawh a inrawlh hma hle a. Mahse a luhchilh tak tak hi chu Hitler-a hunlai, 1930’s chhoa an chhungkua German hmar lama an tawm bo hnu, Hamsburg-a an rawn let, a tleirawl chhuah chhoh aṭangin a luhchilh ṭan a ni. A tuina lam chu eng dang ni loin incheina khawvel a ni tih a chian hnu chuan, luhchilh tak tak turin kum 14 mi lek anih laiin a chhungte duhsakna leh phalna thlapin Paris khawpui a pan ve rawih a. Kum hnih vel awrh chauh a awm tihin design competition-ah a milem ziah leh puanthan them lak khawm te chu thehlut vein, coat category bikah pakhatna a la nghe nghe. Hei hi a bul ṭanna cauh niin, hemi ṭum hian a dam chhunga a ṭhian ṭha leh a hnaa puitu pakhat, khawvel designer hmingthang ve tho Yves Saint Laurent nen an intawng nghe nghe.

A tir lamah chuan French Designer, khang hunlaia lar tak mai, Pierre Balmain hnuaiah assistant hna a thawk ve lawp lawp a, a hnu deuhah a inzir chho zel a, 1961 chuan hmun danga thawk pahin a chhuahsan ta nge nge a. Chutah Chloe hnuaiah collection a siam nual hnuin, vawiina a larpui tak em em Fendi hnuaiah ramsa hmul (fur)-a siam thawmhnaw a siam chhuak ta a, a larpui hle a, vawiin thlengin Fendi tan hian a thawhhlawk hle a, fur-ho bikah hian Creative Director a ni nghe nghe. 1980’s chhoah chuan incheina khawvelah na na chuan mite hriat a hlawh tawh hle a, press lam pawhin an ngaihven tawh hle a ni. A design dangdai leh mi tih loh dan style danglam tak tak a rawn siamchhuah fo takah chuan ngaisang leh duhtu a ngah chho ta hle a ni. Designing House lian tak tak hnuaiah a thawk kawp nasa hle a, Chanel hnuaiah thawk lehin, hak mai theih tur chi, Ready to wear line a rawn siamchhuahsak nghe nghe. Heng bakah hian Fendi logo, vawiina an larpui tak em em, F double hi 1960’s chhoa a hmuhchhuahsak a ni bawk.

Mi hnuaia thawh reng zawng, a ti ve deuh nge, 1984 ah chuan ama hmingchawiin thawmhnaw a siam chhuak ve ta nge nge a, a design dangdai tak, khang hunlaia mi la tih tam loh, jacket rawng lar vut vut a siam chhuah te chu mi hlut a hlawh hle a. Mahse a design a dangdai tluk zeta mi danglam a nihzia lantir nan kum 2005 a lo her chhuah meuh chuan a label chu designer ve tho Tommy Hilfiger hnenah a hralh ta daih a. Film lam leh Photography (thlalak) lam a luhchilh ren rawn a, 2011 a lo thlen meuh chuan Swedish company pakhat Orrefors tan tarmit a design-sak leh ta lawp lawp a, a hnuah Macy’s ho tan thawmhnaw a design-sak leh ren rawn bawk. Lagerfeld hi a le loh bik em em vang pawh ni loin, mihring thil thar hmuchhuak/ngaina lutuk anih vang te pawh a ni ang e, thil ngai a hne zung zung a, ama sawi dan takah thil thar leh mi tih ngai loh tih hi ka nuam tih ber a ni e, a ti nghe nghe, a chezia hi a mak lem lo e.