Sangtei Khawlhring Beiseina kha a beisei pha lo!

stAge band nen hla hit ropui, 'Beiseina' an tichhuak a, mahse Sangtei Khawlhring chuan kha hla kha khatiang khawpa a hit a, a hlawhtlin a beisei tlat lo!

Sangtei Khawlhring hian an hla hit 'Beiseina' kha a ṭha tiin mawi ti viau mah se, Ṭhazual chart-ah te, Ṭhazual Award-ah nominate zing≠ah a telin hlawhtlinna a dawng ang tih a ring pha lo. "Kha hla avang khan fakna ka dawng ve reng a, a nuam khawp mai. Khatianga a hlawhtlin kha ka beisei pha lo," a ti. He hlaa stAge band nena an hlawhtlin avangin mimal takin Sangtei hian hmun hrang hrangah zai tura sawmna pawh a dawn phah nual a ni.

Khatiang khawp khan hlawhtlinpui mah se, Sangtei hian music video dang, mimal emaw pawhin buatsaih mai erawh a tum rih lo. "Zirlai ka ni a, tun thut thuta han tih nghal erawh chu ka tum lem lo," a ti; Pachhunga University College-ah a kal mek. "Hla neih sa chu ka nei a, mahse music video tak hi chu kumin chhungte hi chuan ka nei hman mai thei," a ti chauh. A chhungte chuan music video siam leh turin an duhpui hle a, kumin hi chuan solo music video a neih ngei ring phawt ang.

Kuminah kan hre lar hluai nachungin music khawvelah Sangtei Khawlhring hian hnuhma a lo nei tawh a, Zonet ROAR TV-ah kum 2014 khan a lo zai daih tawh. Mi tam takin Sangtei Khawlhring kan hriatna hmasa chu The Keys band-ah a ni. The Keys-ah hian vocalist a ni a, nikum pawh khan Jowai, Meghalaya-ah an zuk che ropui hle tawh a nih kha. Hei bakah hian Durtlang Branch YMA zaipawlah telin, an hla 'Ṭhuva awm≠har' chu ngaihthlak a hlawh hle a nih kha.

The Keys band chung≠changah Sangtei chuan, "Kan la kehdarh lo a, kan guitarist Hriat≠puia a boral avangin hma kan la la lawk lo a ni zawk," a ti a, "Inhmuh≠khawm erawh a harsa ve deuh tawh; a ṭhen hian hna an nei tawh bawk nen," a tih zawm. "Kan guitarist Hriatpuia pual hian video siam kan rilruk a, hma pawh kan theih tlan ve leh kan la chhunzawm ang," a ti.