Tim Tebow-an kohhrante kaltlangin Mi retheite pualin hun a buatsaih dawn

American football player zinga lar leh huhang ngah, Tim Tebow chuan a foundation kaltlangin ram palia kohhrante chu mi retheite puala hun an hman a, an ṭanpui theihna turin pawisa a pe dawn.

A kristian ṭhat em avanga lar leh, khawvel hmun hrang hranga Kristiantena an ngaihsan Tim Tebow chuan a foundation kaltnagin Night to Shine prom a buatsaih dawn a, a buatsaih hun tur atan February 12, 2016 ruahman a ni. He hunah hian mi rethei, kum 16 chin leh chung lam, a bik taka enkawl ngaite tan zan hlimawm buatsaihsak a tum. He zanah hian heng an koh khawm turte hi ropui leh hausa anga enkawl an ni ang a, heng mitena an dam chhunga vawi khat tal tawn ve an châk ṭhin, a nuam thei ang bera hun hman a, mi pawimawh ber anga enkawl chu hemi zan hian an tihhlawhtlinsak dawn a ni.

Tim Tebow Foundation chuan hemi tur hian US bik leh ram dang pathuma kohhran zate chu sum leh paiin a pui ang a, dollar 8,500 ṭheuh a pe ang a, heng kohhrante hian hun hi an buatsaih dawn a ni. US-ah chuan state 26-a kohhran 44-ah buatsaih a ni ang.

Night to Shine hunah hunah hian an mi sawm, mi bik, enkawl ngai bikte chu celeb an chiauau ṭhin dan ang takin, limousine car-ah an chuantir ang a, red carpet-ah an kaltir ang a, paparazzi te pawh an hmang dawn. An sam, hmai leh taksa te chei turin hair & make-up-a mi thiam bikte hman an ni vek bawk ang a, lâmna hun hlimawm takte an buatsaih ang. Tebow chuan, "He zan hi heng mite hi Pathian fate an nihzia kan hriat theihna tura buatsaih a ni a, mi tin hi Pathian mithmuhah chuan inang khat vek kan ni a, lalnu leh lalpa anga veka hlu kan ni," a ti.