Yoga

International Day of Yoga chung­chang te, tuna BJP sorkarin Yoga leh a behbawm a tuipui dante kan hria a, Mizote pawh min la nghawng tual tual dawn. Sakhuana thil zawnga ngaihtuahin ṭhenkhat chuan ṭha lo hlein an hria a, ṭhenkhat chuan pawi vak loin an hre thung.

Yoga hi a lo chhuahna chu Hindu sakhua a ni a, tunlai khaw­velah, khawthlang ramahte nasa takin an uar a, inenkawl nan an hmang nasa hle. Hetiang hi Mizo Kris­tian hian ti ve dawn ta se, a pawi ang em?

Yoga hrim hrim hi a hmanna leh hman dan azirin Kristiante tih chi leh tih chi loh a awmin alang. Yoga hi chi hrang hrang a tam khawp a, tam tak chu tunhnaia an hmuhchhuah thar leh an din chawpte a ni hlawm. Ṭhenkhat hi chu a sakhuana lai paih a, a exercise lai chauh chawivâwng te pawh a awm a, chung zinga tunlaia khawthlang rama lar em em chu Asana leh Pranayama te hi an ni. Asana hian body exercise lam a uar a, Pranayama-ah hi chuan thâwk dan thunun, breathing exercise lam a uar thung.

Kum 2014-a UN-in Inter­natio­nal Day of Yoga a puan aṭang khan Greek Othodox Koh­hran, Greece Pa­triarchate chuan khawmpui an nei a, chu an khawm­pui, Holy Synod of the Church of Greece chuan Kristianna huang chhung­ah Yoga seng luh hi thil ṭha a ni lo e, tiin, Kristiante nunah chuan hmun a nei tur a ni lo, tiin thu an lo titlu tawh a ni. Hetihlai hian Kristian tam tak chuan Krismas leh Easter Sunday te pawh a rawn chhuahna chu ringlo sakhua aṭangin a ni a, chu chu tihkristian a ni tawh a, Kristianna thilah mi zawng zawngin an ngai tawh; Yoga pawh hi a danglam lutuk lo e, Kristiante tan tih a pawi lo e, an lo ti ve mek bawk a ni.

Tunah hi chuan khawthlang ramahte chuan Yoga hi a hmanna hrang hrang an hre hnem hle; stress leh anxiety enkawl nan te, taksa sawizawi nan hrim hrim te, thlarau lam intuaitharna leh rilru chawlh hahdamtir nan ten an hmang nasa. Mahni inthununna neih nan te pawh an hmang nasa hle bawk. Milar tam tak hian an taksa enkawl nan leh fitness atan Yoga an ti nasa hle.