21st century-a Billboard 200-a No 1 ni rei thei ber Adele '21'

18th January, 2025

Kum zabi 21 chhunga Billboard 200 album chart-ah No 1 dinhmun hauh rei thei ber chu British singer, Adele album, '21' niin a zawn loin kar 24 chhung No 1 dinhmun a hauh thei a ni.

'21' hi Adele album pahnihna niin, kum 2011 January 24-a a tih chhuah a ni. Hemi kum March 12 chawlhkarah Billboard 200 chart-ah No 1-ah rawn langin, a zawn loin June 2012 thleng khan chart chung ber dinhmunah hian a lang thei. He album hmang hian Grammy album of the year award pawh a dawng nghe nghe. Kum 2011 leh 2012 khan khawvel huapa album hralh ṭhat ber a ni. Rolling Stone magazine-in '500 Greatest Albums of all Time' a thlanah telin, '1001 Albums You Must Hear Before You Die' tihah pawh telh a ni bawk.

Country singer, Morgan Wallen chuan a studio album pathumna, 'One Thing at a Time' chu album chart-ah kar 19 chhung No 1 a nihpui bawk. He album hi March 3, 2023-ah a tih chhuah niin, a vawi khatna atan March 18, 2023-ah Billboard 200-ah No 1 a ni.

Taylor Swift album thar ber, 'The Tortured Poets Department' chu kar 17 chhung album chart-ah No 1 a ni thei bawk. He album hi Swift album studio 11-na a ni a, kum 2024, April 19-ah a tih chhuah niin, May 2, 2024-ah No 1-ah a rawng lang nghal.

Puerto Rican rapper leh singer, Bad Bunnu solo album panga, 'UnVerano Sin Ti' chu kar 13 chhung No 1 a ni thei bawk. He album hi May 6, 2022-ah tih chhuah niin, hla 23 a awm. Grammy Awards-a Album of the Year nomination-a Spanish-language album lang thei hmasa ber a ni.

Canadian rapper, Drake-a'n kum 2016, April 29-a a tih chhuah, a studio album palina, 'Views' chu Billboard album chart-ah hian kar 13 chhung No 1 a ni thei bawk. He album-ah hian PartyNextDoor, Pimp C, Dvsn, Wizkid, Kyla, Future, leh Rihanna a zaipuina hlate a tel.

21st century-a Billboad 200 album chart-a kar 10 chhung No 1 ni thei zingah Frozen Soundtrack (kar 13), Taylor Swift '1989' (kar 11), Taylor Swift 'Fearless' (kar 11), SZA 'SOS' (kar 10), Morgan Wallen 'Dangerous : The Double Album' (kar 10) leh Adele '25' (kar 10) te an awm bawk a ni.