Liam ṭhianpa-in Liam-a pa a khing

One Direction star, nikum October thlaa boral Liam Payne-a ṭhianpa, Roger Nores chuan Liam-a pa, Geoff Payne chu a chungchang a sawi danah a ti hmingchhia nia sawiin a khing.

Payne hi Argentina-a Buenos Aires-a a thlenna balcony aṭanga tlain a thi a, a thihna kaihnawihah hian mi panga thubuai siamsak niin an zingah hian Nores pawh hi a tel. Argentina official-te chuan Liam pa, Geoff Payne a thusawi behchhanin, Nores hi a thianpa ngaihthah leh, enkawl tura a mawhphurhna hlen loah an puh a ni. Hemi avang hian Nores hian Florida, US-ah thubuai hi a thehlut a, Liam-a pain a fapa addiction avangin amah enkawl hna hi a bialnu, Kate Cassidy leh Nores te kutah dah nia a sawi chu a dik lo tih a sawi. Nores chuan Liam nen chuan ṭhianṭha tak an ni a, mahse eng dan hmang mahin amah enkawltu, caretaker-a dah a ni lo tih a tarlang. A pa thusawi dan, media lama thehdarh chuan a tan nghawng ṭha lo tak neiin,a hming a tih chhiat phah hle tih a sawi bawk.