Covid-19 Frontline worker-te pual hla tichhuak dawn

Amtea leh Melody Lalzirliani-te chuan vawiin hian H Lalngaihdama hla phuah 'Kan ram tan' chu an tichhuak dawn a, Zonet, LPS leh Zorimawi YouTube Channel-ahte an music video thlira ngaihthlak theihin an dah chhuak ang. 

'Kan ram tan' hi Masky Record-a an record niin Kima Chhangtein music a siam sak thung a, hripui leng mek Covid-19 dona kawnga hmatawnga ṭang frontliner-te pual hla a ni dawn. H Lalngaihdama chuan, "Covid-19 hrileng mek avangin mipui mangang takin kan awm a, kan ram venhim a ṭul a, zofate kan him theihna turin theihtawp chhuah aṭul. Hrikai hlauhawm tak ni chungin Covid-19 dona kawngah mi inpe tam tak an awm a,  mahni inphatin hri do turin hmatawngah an inpe. Pasal ṭha ramchhuak ten an ral beihtur chu hneh ngei turin an hmachhawn angin he hri hi umbo tum leh hneh tumin ke an pen chhuak mek a ni. Mahni inlum pawh luah hman loin Zoram mipui tan hnehna hla do chham lo chuan kir an tum tawh lo. Hetiang taka mi inpe kan hma a ding kan Frontline-te hi 'Kan ram tan' an in pe a ni. Zoram mipui ten kan ṭawngṭaina zarah vawiin thlengin nunna chan kan awm lo te hi a lawmawm hle," tiin a hla phuah chungchang sawiin hri dona kawnga hmatawnga ṭangte chu a fak hle.

'Kan ram tan' chang khatnaah hian hri leng vanga kan mangan em em laia hma tawnga ṭang turte lo dinchhuah thu puanchhuah a ni a, chang hnihnaah chuan  frontline (kan hnam Pasalṭha) te chuan hneh loh neih an tum loh thu leh mahni inphata an thawh thute tarlan niin chang thumnaah chuan an tan Zoram mipuiin kan dilsak thu tarlan a ni thung. A thunawnah chuan Zoram tan an inhlan ral mek thute tarlan niin, kan frontline-te huaisen taka Lalpa chakna ringa kal zel tura fuihna thute a tel thung a ni.