Kristiante tana hmun pawimawh
Khawvel hmun hrang hrang aṭangin infiammi sang rualten Rio Olympic-ah intihsiakna an bei a, ram hrang hrang aṭanga kal zingah Kristian ṭha tak tak an awm. A bikin US aṭangin evangelical Kristian an tel nawk hlawm.
US team-a mi, diver, David Boudia tan hian Beijing Olympic leh Rio Olympic a inthlak danglam nasa hle. "Kum 2008-a Beijing-ah kha chuan diving hi ka pathian a ni ber mai a, tunah erawh chuan a dan a dang ta...Pathian chuan he hun hi min pe a, a chhan chu keimah kaltlanga intar chhuah a duh a ni," a ti. Amah kaltlanga Pathian ropuina an hmuh theih nan tun ṭum intihsiakna hi a bei.
Gymnastic team-a mi, Simone Blies hi kum 19 mi lek a ni nachungin, "Thil lian tham, ka tel ve turah reng reng, intihsiakna a awm hma emaw, hetiang lian thama ka tel dawnin ka inkhawm ziah a ni," a ti. A chhungte pawh Kristian ṭha tak an ni a, Catholic Kohhran mi a ni nghe nghe. Track & Field lama US chhuanvawr zinga mi, Allyson Felix hi Kristian ṭha a ni tih a lantir ṭhin a, "Kum naupang tÍ ka nih aṭangin Isua hi ka chhandamtu a ni tih ka pawm tawh a...tun thlengin ani nena kan inlaichinna a ṭhanlen zel theih nan theihtawp ka chhuah a ni," a ti.
NBA aṭanga kan hriat lar, Kevin Durant pawh US Basketball team-ah a tel a, a theihna leh thiamna te hi amah
aṭang liau liaua chhuak a ni lo tih a hria. "Isua Krista thisen chhuak avang zawk khan kan nungin kan che a ni," a ti. US gymnastics team-a mi Gabby Douglas chuan, "Ka rinna puan chhuah nan leh amah aiawha inlan thei tura hun ṭha leh ta≠lent min pek avangin ka tan chuan Pathian chawimawi hi a pawimawh ber a ni," a ti.
US swimming team-a mi, Missy Franklin chuan, "Kum li danah khawvel hmun hrang hrang aṭangin infiammi te, an chhungkhat leh ṭhiante an fuankhawm ṭhin. Hetiang hun hi Pathian chuan a awmpui ngei tih ka hria a, a awmpuina chu midangte pawhin an hriat ve ka beisei a ni. Ani chuan mi hrang hrangte kan inanna leh kan danglamna chu kan inngeihtawnna tur a nih theih nan hun ṭha a hawng a ni," a ti.
Khawvela mimala Olympic-a gold medal la hnem ber Michael Phelps hi a lara a hlawhtlin chhoh khan a nun a hmang thiam lo a, ruihhlo leh nawmchenna kawngah a tl‚n a ni. Olympic intihsiakna a chawlhsan hnuah a rawn kir leh a, tunah chuan nun danglam a nei tawh thung. Rick Warren-a lehkhabu, The Purpose Driven Life aṭanga nun danglamna chhar ta hian, "Keimah aia ropui leh thiltithei zawk a awm a, chu chuan he khawvelah hian chhan neiin min dah a ni," a ti.