2025 Producers Guild Awards nominee puang

Producers Guild of America (PGA) chuan film leh television category hrang hranga 2025 nomination a puang ta. Nomination puan hun hi Los Angeles ram kang thleng vangin a lo ti khawtlai tawh a ni.

PGA hian caterogry pangngaia award a sem chhuah bakah, mimal hnenah special award a hlan dawn bawk. Chris Meledandri chuan David O. Selznick Achievement Award a dawng dawn a, Dana Walden hnenah Milestone Award, Taika Waititi hnenah Norman Lear Achievement Award bakah Lynda Obst leh Paula Weinstein hnenah Trailblazer Award hlan an ni ang.

36th PGA hi February 8, 2025 hian Los Angeles-a Fairmont Century Plaza-ah neih a ni dawn a, he hun hi kangmei chhuak tuartute tana vehbur khawnna hun atan hman a ni nghal dawn bawk.

Top film prize dawng tura chhawp chhuah zingah Anora, The Brutalist, A Complete Unknown, Conclave, Dune: Part Two, Emilia Pérez, A Real Pain, September 5, The Substance leh Wicked an lang a, TV category lamah Bad Sisters, The Diplomat, Fallout, Shogun leh Slow Horses te chu nominee zingah an lang bawk a ni.

PGA nominee-te hi Oscars nomination-ah an lang chho tlangpui ṭhin. Nikum khan PGA best picture nominee te chu Oscar nomination-ah an lang vek a, mahse kum 2023-ah erawh PGA nominee zinga pathum chu Oscar nomination-ah an lang pha lo thung.