Hindi zirtirtu lak a ni lo - NSUI

Congress party-a zirlai pawl, National Students' Union of India (NSUI), Mizoram chuan thuchhuah siamin, sorkar laipuiin November 29, 2019 khan Centrally sponsored scheme hnuaiah Hindi zirtirtu (language teacher) 665 lâk phalna Mizoram sorkar hnenah a pêk tawh laiin, tun thlengin lâk a la ni lo tih an tarlang.

NSUI, Mizoram tarlan danin, sorkar laipuiin Mizoram sorkar hnena November 29, 2019-a Hindi teacher 665 lak phalna a pek anga zirtirtu lakte chu March 31, 2020 thlenga thawk tura tih a ni a; mahse, Mizoram sorkarin a tihlawhtling lo.

August 20, 2020 khan sorkar laipuiin Hindi zirtirtu 665 lâk phalna Mizoram sorkar a pe leh tih sawiin NSUI chuan, "A rang thei ang bera Hindi teacher lakna buaipui tawh turin School Education Minister leh department hotute kan ngenin kan phût tak zet. Mizoram sorkar pawh a intiam tawhna ang ngeiin CSS hnuaia Hindi teacher 1,305 bàn tâkte kha rawih chhunzawm dan ngaihtuah turin kan phût bawk," an ti.