LA Wildfire Benefit Concert-a zai turah Olivia Rodrigo leh Stevie Wonder telh

Los Angeles chhehvel ram kang nasa tak thleng tuarte tana vehbur khawnna tur, LA Wildfire Benefit Concert-a zai turte puan belh zel an ni a, Olivia Rodrigo, Stevie Wonder leh Peso Pluma te chu perform tur zingah telh thar an ni.

Concert hi January 30 hian Inglewood, California-a Kia Forum leh Intuit Dome-ah neih a ni dawn. The Eagles chuan concert neih tur pual hian USD mtd 2.5 an thawh tawh bawk. He concert kaltlanga sum hmuh zawng zawng chu ram kang tuarte chhawmdawlna tur te, kangmei chhuak belh zel tur danna kawnga hma lakna leh, kangmeiin thil a tih chhiatte din thar lehna atante hman a ni ang. Fund hi Annenberg Foundation-in a enkawl zui ang. Concert hi platform hrang hrang - AMC Theatres, iHeartRadio, Apple Music, Netflix, Paramount+, Prime Video, Max, SiriusXM, SoundCloud, Veeps, leh YouTube ahte pe chhuakin, US-a radio station 860 chuangin an pe chhuak dawn bawk. US-ah AMC theatre thlan bikah pek a ni bawk ang. Concert hi Shelli, Irving leh Azoff chhungkuain Live Nation leh AEG Presents thawhpuia an huaihawt tur a ni.