Billboard 200 Big Sean-in Taylor Swift A nek chhuak ta

Billboard 200 chart-ah Taylor Swift rorelna hun chu tihtawpin a awm ta a, Big Sean chuan a album thar 'Detroit 2' hmangin Swift hi a nek chhuak a ni. Pop Smoke 'Shoot For The Stars Aim For The Moon' bawk pahnihna ni lehin Juice WRLD 'Legends Never Die' chu pathumna a ni leh bawk.

'Detroit 2' hi Big Sean studio album pangana a ni a, September 4 khan a tlangzarh a ni. He album-ah hian mi hrang hrang a thawhpui a, chung zingah chuan  Eminem, Royce da 5'9", Dwele, Post Malone, Travis Scott, Young Thug, Lil Wayne, Diddy, Kash Doll, leh Nipsey Hussle-te pawh an tel.

March 13-a tlangzarh a tum tawh kha a ni a, mahse hripui leng vangin tlangzarh hun a sawn hla a, September 4 khan a tlangzarh ta zawk a ni. Album a tlangzarh hma hian single pahnih 'Deep Reverence' leh 'Harder Than My Demons'-te chu a tlangzarh tawh bawk.

Track 21 lai awmna 'Detroit 2' hi kar hmasa chhung khan album-equivalent units 103,000 lai a hmu chhuak a, Billboard 200 chart-a Sean-a'n No.1 album pathum a neihna a ni. A album-a track hrang hrangte hi US-ah chuan stream maktaduai 93.55 a awm tawh.

Taylor Swift chuan a album thar 'Folklore' hmanga Billboard 200 chart-a kar ruk lai ro a rel hnuah a rorel hun a tawp ve ta a, panganaah a tla thla. Folklore vang hian record hrang hrang siamin mi bik tlemte chauhin an thlen theih huangte a dai phah a, tunah erawh No.1 a nihna dinhmun chu Big Sean hian a chhuhsak ve ta a ni.

Billboard Hot 100 chart-ah chuan Cardi B Featuring Megan Thee Stallion 'WAP' chu pakhatna a ni a, BTS Dynamite chu pahihna a ni thung. Billboard Global 200 chart-ah pawh anni pahnih tho hian hma hruaiin pakhatna leh pahnihna an ni leh bawk.

Billboard Artist 100 chart-ah erawh BTS pa­khat­na an ni a, Big Sean hi pahnihna niin 6ix9ine chu pathumna a ni ve bawk. Taylor Swift chu palina a ni a, Juice WRLD chu pangana a ni thung.