iHeartRadio Music Awards : Taylor Swift leh Morgan Wallen ten nomination hmu hnem

2025 iHeartRadio Music Awards chuan nomination a ti chhuak a, Taylor Swift leh Morgan Wallen te chuan nomination hmu hnem berin 10 ve ve an hmu. An hnuaiah nomination pakua hmu hi Kendrick Lamar, Sabrina Carpenter leh Post Malone te an awm bawk.

March 17, 2025 a Dolby Theatre, Los Angeles-a 2025 iHeartRadio Music Awards neih turah hian Taylor Swift tour neih zawh tak, Eras Tour chu 'Tour of the Century' chawimawina hlan a ni bawk ang.

iHeartRadio Awards hi iHeartRadio station leh app kaltlanga artist leh hla play nasat zualte hnena hlan ṭhin a ni.

Awards show-ah hian kum 2024 chhunga artist che ṭha leh hla larte chawimawina hlan an nih rualin Los Angeles kangmei chhuak vanga chhiatna tuartute tawrhpuina lantir a ni dawn bawk. An ticket hralhna hi kangmei tuarte tana vehbur khawnna tur concert buaipuitute hnenah an thawh dawn a ni.

Lady Gaga chuan rimawi lama a thawh hlawk avangin iHeartRadio Innovator Award a dawng dawn a, he chawimawina hi a hmain Beyonce Knowles leh Pharrel William te pawhin an lo dawng tawh a ni. Mariah Carey hnenah iHeartRadio Icon Award hlan a ni bawk ang. Carey hian khawvel huapin record mtd 200 chuang a hralh bakah, No 1 single hi 19 zet a nei. iHeartRadio Icon Award hi Cher, Elton John leh Bon Jovi te pawhin an lo dawng tawh.

Kumina award dawngtu tur thlannaah hian category ṭhenkhat - Best Lyrics, Best Music Video leh category siam thar, Favorite Tour Tradition, Favorite Surprise Guest leh Favorite K-pop Dance Challenge ah fan lamin iHeartRadio.com/awards ah vote an thlak thei a, March 10 thleng vote thlak hun hi hawn a ni.