'It Ends With Us' ziaktuin a IG ti tawp

'It Ends With Us' changtute, Blake Lively leh Justin Baldonie te inkara buaina a zualzel hnuah, a film behchhan, 'It Ends With Us' lehkhabu ziaktu, Colleen Hoover chuan a Instagram account a ti tawp.

Hoover hian a IG a tih tawp chhan hi sawi lo mah se, Lively leh Baldoni te buaina neih leh, court lama an inkhin zui nghawng nia ngaih a ni. Actor-te pahnih buaina hi a la zual zel a, Lively hian mipat hmeichhiat lam hawia a laka che mawi loa puha Baldoni lakah complaint a theh luh hnuah, Baldoni pawhin Lively te nupa chu a hming tih chhiat tuma puhna thubuai pawh a lo theh lut ve tawh bawk. Baldoni hian website siam a, hetah hian Lively a puhna hrang hranga finfiahna te pawh dah a tum thute a sawi. 'It Ends With Us' film hi nikum August thla khan tlangzarh niin box office lamah a che ṭha hle a, USD mtd 350 chuang a la lut tawh a ni. Mahse tlangzarh a nih hnuah a changtute pahnih inkar hi a chhe chho hle a ni.