Justin Bieber single thar naktukah

Justin Bieber chuan naktuk hian hla thar 'Holy' a tichhuak dawn a, he hlaah hian  Chance the Rapper a thawhpui a ni.

Kum 26 mi Canadian singer hian a Instagram-ah hemi chungchang hi a tarlang a, Chance pawh hian social media kaltlangin a tarlang ve bawk. JB hian a teaser-te pawh a lo tichhuak tawh bawk a, naktuk lamah hi chuan streaming platform hrang hrangah a ngaithlak theih tawh ang.

'Love Yourself' hitmaker hian hla thar a nei lo rei leh ta deuh a, 'Holy' hi a studio album 'Changes' a tlang­zarh hnua a hla thar tih­chhuah leh hmasa ber tur a ni.

Bieber hi hripui leng vangin a la tour thei lo a, a album thar tihlarna tura May thla aṭanga tour neih a tum pawh vawiin thleng hian a la tihlawhtling thei lo a, nakkum lamah erawh tour a tum ruh hle.

Thuchhuah a siamah pawh a fan-te nena inpawh taka hun hmana tour a chak tawh thute a tarlang a, ruahmanna a siam anga a kal thei a nih chuan nakkum June thla aṭangin tour a nei ṭan dawn a ni.