Kar hnihnaah pawh Jurrasic a la pui

Kar hmasa khan sum maktaduai 100 chuang fe lalutin Jurrasic World chu box office-ah pakhatna a ni a, kar hnihnaah pawh maktaduai za chuang bawk lalutin pahnihnaah a awm.

Kar tawp chhung khan Jurassic World hian dollar mtd 102 zet a la lalut thei. Kar liam ta chhung khan North America-a theatre 4,291 zetah chhuah a ni. US ram pawna ram 66 aṭanga a sum lakluh hi dollar mtd 160.5 a ni a, hengte nen hian US ni lo, ram hrang hrang aṭanga a sum lakluh tawh zawng zawng chu dollar mtd 583.1 zet a tling tawh a ni. US nena chhut tel phei chuan sum a thawk chhuak hnem tawh hle a, dollar mtd 981.3 zet a ni tawh a, tiang zela a hlawhtling a nih chuan movie zinga dollar tluklehdingawn khat hmu chhuak rang ber a ni thei ang.

Pahnihnaah Pixar chhuak 'Inside Out (2015)' a awm a, he movie hian kar tawp chhung khan dollar mtd 91.1 zet a lalut. Jurassic World hi chu awm lo se chuan pakhatna a ni chiang dawn hle a ni. He animated movie hi Pixar-in a tihchhuah tawh zinga sum lalut hnem ber dawttu a ni a, a tam ber chu Toy Story 3 kha niin, kar khat chhungin dollar mtd 110.3 a lalut thei.

Inside Out (2015) hi a ropui hle; eng emaw lehkhabu emaw, thuziak sa behchhan nei lo, original movie zinga opening week-a sum lalut hnem ber a ni. A hmaa sum lalut hnem ber ṭhin chu Avatar kha a ni a, a hapta hmasa berah dollar mtd 77 a lalut. Inside Out movie hi ram dang 37-ah tihchhuah a ni bawk a, heng ramte aṭang hian dollar mtd 41 hmuin, tuna a sum thawh chhuah tawh zawng zawng chu dollar mtd 132.1 a tling tawh a ni.

Comedy film, Spy chu pathumnaah a awm a, kar tawp chhung khan dollar mtd 10.5 a lakluh belh leh. Hengte nen hian US pumpuia a sum lakluh tawh zawng zawng chu dollar mtd 74.4 a ni tawh a, khawvel pum nen chuan dollar mtd 170.4 a lalut tawh a ni.

Box office movies:

"Jurassic World" - $mtd102

"Inside Out (2015)" - $mtd91.1

"Spy" - $mtd10.5

"San Andreas" - $mtd8.2

"Dope" - $mtd6

"Insidious Chapter 3" - $mtd4.1

"Pitch Perfect 2" - $mtd3.2

"Mad Max: Fury Road" - $mtd2.8

"Avengers: Age of Ultron" - $mtd2.7

"Tomorrowland" - $mtd2