Kirk Franklin-a'n Black Music Icon Award dawng dawn

Gospel music legend, kum 54 mi Kirk Franklin hnenah Black Music Icon Award hlan a ni dawn a, January 30, 2025-a 4th annual Recording Academy Honors-ah chawimawina hi hlan a ni ang.

Franklin hian Grammy Award pawh 20 zet la tawhin, R&B leh hip hop hmanga gospel music-a danglamna nasa tak thlentu nia sawi a ni. Kanye West, Mary J Blige leh Chance the Rapper te pawh a lo thawhpui tawh a ni.

Forth Worth, Texax-a seilian a ni a, kum li mi lek a nih aṭangin piano a tum tawh a, kum 11 a nih in zaipawl a kaihruai thei tawh bawk A debut album, 'Kirk Franklin & The Family' chu gospel album zingah copy maktaduai 1 chuang hralh chhuah hmasa ber niin, Billboard Gospel chart-ah kar 100 chhung a lang thei bawk. A hit 'Stomp', 'Revolutionl' leh 'Brighter Day' te chu khawvel huapin a larpui thei a ni. A 2023 album, 'Fathers' Day' chu kumin Grammy Awards-ah best gospel album nomination-ah a lang. Gold leh platinum certified album 13 neiin, Dove Award pakua, Stellar Award 33 leh Soul Train Award a lo dawng tawh bawk.

Black Music Icon Award hi mihang artist, music industry lama nghawng lian tak leh, an thiamna hmanga rimawi lama hriatreng tlak thil hnutchhiahte hnenah hlan ṭhin a ni. He chawimawina hlanna hi 67th Grammy Awards neih hma, January 30 hian Los Angeles-a Fairmount Century Plaza-ah neih a ni ang.