Jeans tight hâk a hlauhawm thei

Australia-a Royal Adelaide Hospital-ah jeans tawt lutuk, tight lutuk, skinny jeans an tih ang chi hâk avangin damlo case an nei ta nual mai! A bikin hmeichhe tan chuan fimkhur emaw, tawt lutuk emaw hak loh a him ṭan a nih hmel ta riau.

Royal Adelaide Hos­pital-ah hian hmeichhe pakhat, kum 35 mi chu tihrawl (muscles) chhia (damage) avang leh, a taksaa tuiril awm khawm avanga hmun khat lian/vûng vak mai leh hriatna thazâm dik lo nasa tak avanga admit a ni a, a chhan an chhui chiang a, a kekawr hâk, tawt lutuk, tight lutuk a hak avanga hetianga awm hi a ni tih hriat chhuah a ni.

He damdawi ina doctor, Thomas Kimber chuan, "He damlo tihrawl leh hriatna thazâm chhe nasa lutuk kan hmuh hian thawktute pawh kan phâwk a, mak kan ti hle a ni," a ti. Thomas Kimber leh a thawhpuite hian hemi case chungchang hi Journal or Neurology, Neurosurgery and Psy­chiatry-ah an chhuah a ni.

Kimber chuan, "A hmain jeans tawt hak hian tâi leh ngûm velah hriatna thazam a khawih pawi thei tih chu kan hre tawh a, mahse kê lamah hetiang tak hian a khawih chhe nasa thei ang tih kan hring lo a, kan la hre ngai lo a ni," a ti. Jeans tawt lutuk hak hian ke lama thisen kal tur a tibuai a, châwn puara tihrawl a tichhe thei a ni tih a sawi a, ke lam atan a hlauhawm hle niin a sawi. "A bikin jeans fân thei lo chi hi a hlauhawm zualin ka hria a, taksa a phuar mar nasa bik hle a ni," a ti.

He nu, jeans tawt lutuk hak avanga damdawi ina an dah luh hian nileng deuh thawin jeans hi a ha a, tlai lamah chuan a kê a mu a, a hmang hlei thei lo a, a tlu a, darkar li chhung zet leia a tluk hnuah damdawi lama thawkten an chhan a ni. Ni li chhung zet damdawi inah uluk taka enkawl a nih hnuah ṭanpuitu tel loin a kal ve thei ṭan chauh.