K-Pop contest-ah entry Rs. 500

July 25-a K-Pop contest preliminary round neih tur chungchang chu bawhzui zel a ni a, entry chungchang leh rawn kal tur ṭhenkhat tihchian a ni tawh. K-Pop contest-a luhna man hi cheng 500 a ni ang a, Korean pop star aṭanga rawn kal tur hriat tawh chu Hyemin Jung a ni.

K-Pop contest hi July 25 khian MZU-a MZU Multipurpose Hall-ah neih a ni dawn a, he huna senso zawng zawng hi Korean Cultural Centre, India (KCCI)-in a tum vek tur a ni. Ticket man cheng 500 a ni ang a, ticket hralhna aṭanga sum lut zawng zawng hi KCCI kuta lut tur ni loin, ṭanpui ngaite ṭanpui nan CM's Relief Fund-ah chhun luh vek a ni ang. Eng emaw bika sum sen ngaih leh thutna a awm a nih chuan ticket hralhna aṭang hian rulh leh tura tih a ni bawk.

KCCI buatsaih K-Pop contest-ah hian India ram hmun hrang hrang aṭangin contestant 60 bawr vel lo kal tura beisei an ni. Contestant-te hi internet kaltlanga intihsiak an neih hnuah preliminary round-a tel tur thlan chhuah an ni ang. Online kaltlanga inelna hi a duh apiang tel theih niin June ni 30 thleng hun hawn a ni. A tel duhte chuan KCCI website india.korean-culture.org tlawh theih reng a ni.

K-Pop contest inelna pui ber, Final Round hi Delhi-a neih tur a ni a, hemia tel turin khawpui pasarih - Mumbai, Chennai, Kolkata, Aizawl, Patna, Bengaluru leh Delhi-ah te July 25 aṭanga August 14 chhung hian preliminary round neih a ni ang. Delhi-a Final Roundneiha a ti ṭha zualte chu a thlawna Korea rama zin theihna leh lawmman hlu tak tak an dawng dawn a ni.

Aizawl K-Pop contest preliminary round-ah hian Korean pop star lar Hyemin Jung a lo tel dawn. Amah hi Korean hmeichhe pop band Gavy NJ member hlui a ni. KCCI Director Kim Kum-pyoung chuan Korean team-te hi a rawn ho dawn a ni.