Uisa kût Protester-te mi Ṭhenkhatin an tibuai

Social media-a China mipui tam berin uisa ei an ngaimawh vak lem lo

China-a Ghuangxi autonomous region-a Yulin khawpuia uisa kût an hman chu Thawhṭanni pawh khan chhunzawm a la ni a, dodalna mi ṭhenkhatin lantirin, sorkar hmunpui tualah an pungkhawm. Heng dodalna lantirtute hi tuten emaw an tibuai a, an hnawt darh.
Yulin-ah hian kum tin uisa kût hman ṭhin a ni a, kum tin he kût lai hian ui sing chuang an talh ṭhin. Nungcha humhalhtute leh ran ngainatute pungkhawm chuan he kût an dodalna hi an lantir a, hetihlai hian mi 20 rual velin dodalna lantirtute hi tibuaiin, an punkhawmna aṭangin an hnawt darh.
Dodaltute hian banner leh thu­ziak hrang hrangte kengin, dân loa ui talh tura la khawmtute chu an chungah hremna lek kawh turin an phut a, ei leh in kawnga hriselna dan sorkarin a siam chu a nihna anga keng kawh turin an phut bawk. Dodaltute kal khawm hi mi 20 rual vel hian an tibuai a, an thuziak kente an tihchhiatsak a ni. Dodaltute hian uisa zuartute chu an dawr an khar luihtir a, hetia mi ṭhenkhatin an tihbuai a, an hnawh darh hnu hian uisa dawr neitute chuan an dawr an hawng a, an hralh chhuak lehnghal a ni.
China hi khawvela uisa ei nasa berte zinga mi a ni a, kum tin ui maktaduai 10 vel chu an talh ṭhin a, Yulin-a uisa festival pawh hi pantu an ṭhahnem thei hle. British comedian lar Ricky Gervais chuan a Twitter-ah uisa kût hman a ni chu a dem thu leh titawp turin a tarlang a, mahse China mipui tam ber chuan uisa ei hi eng huah an ngai vak lo. China-a Twitter ang tluka an hman, Sina Weibo-ah chuan sawiselna leh dodalna a awm lem lo a, mi ṭhenkhat chuan, "Uisa eite chu a pawi em em hleinem. Mahse mi ui vulh lai chu talh turin ruksak lo se," tih leh a tlukpuite an sawi chhuak hlawm a, mi ui vulh lai ruksak erawh an duh lo tlangpui.