VANLALPARI Khawngaihna hla nen a rawn lang leh e

Vanlalpari, Mapuii tia kan hriat chuan Ṭhazual Fakna chart-a pakhatna vawi hnih lai a luah theih hnuah hla thar dang a rawn tichhuak leh a, he hlaah hi chuan khawngaihna chungchang min ngaihthlaktir dawn. MDM library-ah pawh dah luh a ni tawh.

Mapuii music video pahnihna hi 'Hei hi khawngaihna' tih a ni a, Hruai≠tea Pachuau lehlin a ni. Blue Wave Records, Chanmari West-ah audio a record a, SVP chuan video a siamsak thung. Aerial filmming hi Mazuala kut hnu a ni bawk; a video hi a mawiin a changkang hle. Audio lamah pawh Mizotena kan la uar em em loh backing vocal mawi tak zeh a ni.

Mapuii hian a music video hmasa ber nikum khan a tichhuak a, chu chu 'I ropui nan' tih hla kha a ni. He hla hi PB Lianhminga phuah a ni a, Albatross vocalist Rintea khan a lo hlawhtlinpui tawh ṭhin. Zonet Ṭhazual chart-ah pakhatna vawi hnih, a zawn loa a luah mai bakah, kumina Ṭhazual Award semah khan he hla avangin Mapuii hian Best New Artist of the Year (Gospel) a la nghe nghe.

Synod Choir aṭanga a chhuah hnuah zai lamah nasa lehzualin a kal a, hei vang hian Mapuii hian hunawl a ngah tehchiam lo. Hmachhawp tam tak a nei a, rawngbawlna tur pawimawh tak tak a nei. Chung zinga langsar chu SYNFO-in solo competition a buatsaih 'Praise On'-ah mentor tur zingah an thlang a, a inbuatsaih chho mek. Parise On mentor tur zingah hian Stacy VL Muanpuii leh Baby Malsawmtluangi te pawh an tel.